Қостанайда былтыр 2 өндірістік жарақат алу оқиғасы тіркелген
«Қазақстан теміржолшысы» газетінің тілшісі
Қостанай магистральдық желі бөлімшесінің директоры өткен жылы шпалдардың шіруінен жылжымалы құрамның екі рет жолдан шығып кеткенін мәлімдеді.
Болат Баймағамбетов, сонымен қатар жол мен бағыттама бұрмалары және байланыс желілерінің нашарлығынан пойыздар бір сағаттан үш рет кідіргенін айтты.
Осындай жағдайлар қайталанбауы үшін бөлімшеде бірқатар шаралар жүргізілген. Атап айтқанда, диагностикалық блок жұмысы мен анықталған кемшіліктерді дер кезінде жою бойынша бақылау күшейтіліп, тракциялық жолдардың ағымдағы күтімі дистанция бастығының жеке бақылауына алынған.
«2020 жылы тракциялық жолдар бойынша 41,7 км жолдың рельс шпалдарын ауыстыру жоспарлануда. Бұған дейін байланыс желілерінің 170 түйіспе қысқыштары ауыстырылса, биыл тағы 50 қысқыш пен 117 өтемдеуіш құрылғыны алмастыру көзделіп отыр», – дейді бөлімше басшысы.
Бөлімшедегі былтыр 2 өндірістік жарақат алу оқиғасы тіркелген. Өндірістік жарақатқа жол бермеу үшін күн сайын мақсатты нұсқаулық жүргізу барысында дирекция бойынша болған келеңсіз жайлар туралы бюллетендер, суретті материалдар қолданылып, жұмысшыларға жоспардан тыс нұсқаулық және техникалық сабақ өткізу жолға қойылған. Жұмысшылардың күн сайын арнайы киім, аяқ киімді киюі, арнайы қорғаныш құралдарын пайдалануы қатаң бақылауға алынған.
– Жалпы алғанда бөлімше бойынша жол жағдайына 72 балл берілді. Жол жағдайының нашарлауына тексерулер мен орта буын басшылардың кемшіліктерді дұрыс және дер кезінде анықтамауы, бұзушылықтарды жоюды дұрыс бақыламауы, дистанция басшылығы тарапынан қозғалыс қауіпсіздігін қамтамасыз етуге жеке қатысу нормативін орындамауы, сонымен қатар жол дистанцияларында ағымдағы жол күтімі бойынша жоспарлы ескертуді нақты жоспарлаудың жоқтығы да себеп болған деген қорытынды жасалды, – деді Б.Баймағамбетов.
Бөлімшеде биылғы жылы мердігерлік жолмен 89 км жолға күрделі жөндеу, 14 км жолға орташа жөндеу жүргізілмек. Және 18 бағыттама бұрманың шпалы темірбетон түріне ауыстырылып, 32 жаңа ағаш білеу жиынтықтарын салу, станциялық 41,8 км жолға күшейтілген орташа жөндеу жүргізу көзделуде екен. Жол машиналарымен жол жағдайын жақсарту және автотракторлық техникамен перегондардың ойықтары бойынша жұмыстар жүргізу де жоспарда. Сол сияқты белгі беру және байланыс және электрмен жабдықтау шаруашылығында да аккумуляторлар, муфттарды, электр сымдарын, СЦБ сымдарын, байланыс желілерін, темір тростарды жаңалау және жөндеу жұмыстары жоспарға енгізілген.