Құрылғыларға күтім қажет
Қызылорда облысы бойынша меншікті тілші
Қазалы белгі беру және байланыс дистанциясының теміржолшылары пойыздардың қозғалыс қауіпсіздігін сақтауды арттыру мақсатында байланыс құрылғыларының жұмыстан тыс қалмауын қадағалап, оларға уақытылы ағымдық күтім жасап, үнемі бақылап отырады.
Бүгін дистанция теміржолшыларының станцияның солтүстік алқымындағы байланыс құрылғыларына кезекті ағымдық күтім жасауға кірісіпті. Кәсіби теміржолшы Ғани Ысқақов басқаратын ұжым, ең бастысы, қазіргі эпидемиялық жағдайға байланысты сақтық шараларын назарда ұстайды.
Ағымдық күтім жұмысы дистанцияның аға электромеханигі Досан Нұржаубаевтың басшылығымен Қуаныш Әмитов және Сәкен Аңсатбаев тарапынан мачталы НМ8 бағдаршамына жасалуда екен.
Электромеханиктер Сакен мен Қуаныш мачталы бағдаршам бағанасына саты арқылы шығып, бағдаршамның жарық көрінісін тексеріп, ток көзінен беріліп тұрған электр қуатының кернеуін өлшеп, құрылғының бірқалыпты жұмыс жасауы үшін тексеру жүргізіп, бақылаудан өткерді.
– Байланыс құрылғыларын кезек-кезегімен тексеріп, олардың жұмыстан тыс қалмауына бақылау жасау – біздің кәсіби міндетіміз. Бағдаршамдар бекітілген кесте бойынша тоқсан сайын технологиялық жағдайына байланысты тексеріліп, ағымдық күтімнен өткізіледі. Немесе орын алған тосын жағдайға байланысты кезектен тыс тексеріліп, анықталған ақау дер кезінде орнына келтіріледі. Ағымдық күтім барысында электромеханиктер бағдаршам жарығының қажетті аумаққа жарық беруін тексерді, бағдаршамға беріліп тұрған электр қуатының кернеуін арнайы құрылғымен өлшеп тексеруден өткізді. Әзірге бағдаршам жұмысында кінәрат жоқ, құрылғылар күтімі мінсіз болса, қозғалысқа да кедергі жоқ, – деді электромеханиктердің жұмысын бақылап тексеріп жүрген аға электромеханик Досан Нұржаубаев.
Ең бастысы, пойыздардың қозғалыс қауіпсіздігін сақтап, дистанция телімдерінен жылжымалы құрамдарды кідіріссіз өткізуді мақсат тұтқан теміржолшылар, әрине, құрылғылармен жұмыс жасағандықтан ең бірінші техникалық қауіпсіздікті сақтауды назарда ұстайды.
Сондықтан құрылғылармен жұмыс кезінде кемінде екі-үш адамнан топ құрып жұмыс жасайды. Қазіргі эпидемиялық жағдайға байланысты одан артық топтасуға рұқсат жоқ.
Қазалылық байланысшылар ағымдағы жылдың алғашқы жартыжылдығында жаман жұмыс істеген жоқ, барлық жұмыстар кестеге сай атқарылуда, дистанциялықтар кінәсінен құрылғылар күтімінен қозғалысқа кедергі келген жоқ.