Рельстер алмастырылуда
Қызылорда облысы бойынша меншікті тілші
Қызылорда жол дистанциясының Шиелі теліміндегі жолшылар қозғалыс қауіпсіздігін сақтап, пойыздардың кедергісіз өткізілуіне үлес қосуда.
Бүгін Шиелі станциясының солтүстік алқымындағы 5-жолда 4-өндірістік телімнің жол бригадирі Бауыржан Тергенбаевтің басшылығымен жол жөндеушілер Ербол Балтабеков, Кенжеғұл Тоғызбаев, Әлмұрат Сүлейменов және Ерлан Уызбаев рельс ауыстыру жұмыстарымен айналысып жатыр. Өздеріне тапсырылған жұмысты бөлінген уақыт ішінде орындауға бекінген жолшылардың қимылы ширақ. Бірі рельс болтын босатып жатса, екіншісі болты босаған рельс астына домкрат орнатып, қалғандары порталды кран көтергішпен босатылған рельстің орнына жаңасын, яғни ұзын рельсті салып жатыр. Жол бригадирі Бауыржан рельстердің ауа температурасының құбылуына, күннің суытып, ысуына байланысты ұзарып-қысқаратындығын, оны уақытылы ауыстырмаса, қозғалыс қауіпсіздігінің бұзылуына себеп болуы мүмкін екенін тәптіштей түсіндірді. Сондықтан күзгі салқын басталғандықтан маусымдық рельстердің ұзын түріне алмастырылып жатқанын жеткізді.
– Ауа температурасының салқындауы жол шаруашылығында өзіндік ерекшелігімен байқалады, бойы тоңазыған маусымдық рельс белгілі бір өлшемге жиырылып қысқаратындықтан жол күтімінің технологиялық талабына сай оны дер кезінде ұзын түрімен алмастыруымыз керек. Қазіргі таңда түнгі ауа температурасының төмендеуі жол қозғалысына кері әсерін тигізбеу үшін маусымдық қысқа рельстер алмастырылуда. Бүгін станцияның солтүстік алқымындағы 5-жолда рельс алмастыру жұмыстарын жасаудамыз. Жұмысқа қажетті құралжабдықтар толық жеткілікті, әріптестерім өз істерін жеткілікті дәрежеде меңгерген тәжірибелі жолшылар болғандықтан жұмыс жасауға кедергі болатын жағдай жоқ. Бізге бөлінген уақытта тапсырманы орындап шығуға тиіспіз, – деді жол бригадирі Бауыржан Тергенбаев.