Атырау магистралдық желі бөлімшесі үздік шықты
Атырау облысы бойынша меншікті тілші
Өндірістік-шаруашылық қызметте жоғары нәтижелерге қол жеткізгені, пойыздар қозғалысының қауіпсіздігін қамтамасыз еткені үшін Атырау магистральдық желі бөлімшесі өткен жылдың қорытындысымен салалық жарыс жеңімпазы деп танылды. Мұндай жарыс жыл сайын еңбек ұжымдары арасында тоқсан, жарты жыл және жыл қорытындысымен өтіп тұратыны белгілі. Соған сай «Салалық жарыстың жеңімпазы» деген атақ өндірістік, шаруашылық, қаржылық және кадрлық қызметте, сонымен қатар пойыздар қозғалысының қауіпсіздігін қамтамасыз етуде жоғары көрсеткіштерге қол жеткізген еңбек ұжымдарына беріледі. Атырау магистральдық желі бөлімшесі 2020 жылы салалық жарыстың барлық көрсеткіштері бойынша ең жоғарғы балл жинаған. Яғни, бөлімше бойынша өндірісте күрделі ақауларға жол берілмеген, өндірістік жарақат алу жағдайлары, аппаттық жағдайлар тіркелмеген. «ҚТЖ» ҰК» АҚ «Магистральдық желі дирекциясы» филиалының бөлімшеге қарасты еңбек ұжымдарын моральдық көтермелеу жөніндегі жұмыс тобының 2020 жылғы салалық жарысты қорытындылау бойынша жиналысының хаттамасы негізінде Атырау магистральдық желі бөлімшесі 1-ші орынға ие болып, 1-дәрежелі дипломмен марапатталды. Мекеменің озық қызметкерлеріне «Үздік маман», «Кәсібі бойынша үздік» атақтары және жұмысшыларға сыйақы берілді. Ал Атырау магистральдық желі бөлімшесінің директоры Елубай Сапаров «Үздік басшы» төсбелгісін иемденіп, үздік бөлімшенің мерейін үстем ете түсті.