Қызылордалықтар озаттар қатарында

Көлік қызметкерлері күнін аймақтағы эпидемиялық ахуалға орайластырып қашықтан атап өтуді ұйымдастырған қызылордалық теміржолшылар еңбек озаттарына лайықты құрмет көрсете білді. Аймақтың алыс бекеттеріндегі әріптестеріне марапаттарды жеткізіп беріп, ал бөлімшеде кішігірім басқосу жасаған бөлімшенің басшылық құрамы теміржолшыларды төл мерекесімен құттықтады, деп хабарлайды Rail-news.kz. Қызылорда магистральдық желі бөлімшесінің директоры Ибраким Басықараев ең алдымен «Құрметті теміржолшы» төсбелгісін алған Ербол Оңғарбаевтың кеудесіне марапатын тағып, құрмет көрсетті. Сонымен қатар екі теміржолшыға «Адал еңбегі үшін», 3 теміржолшыға «Үздік маман» белгісін табыс етті. Тағы бір теміржолшы «Кәсібі бойынша үздік» атанса, компания басшылығының алғыс хаты мен мақтау қағазы 2 теміржолшыға берілді. Бұдан кейін Қызылорда жол бөлімшесі теміржолшыларының жұмыс орнында марапат табыстау рәсімі өткізілді. Жалпы биылғы мерекеде бөлімшенің Қызылорда станциясындағы жеке құрамынан 11 теміржолшы марапатталып отыр, оның ішінде техникалық бөлім басшысы Жарқынбек Рсымбетов «Адал еңбегі үшін» төсбелгісіне лайық деп танылды. Бөлімшенің кәсіподақ ұйымы төрағасы Мұхтар Өмірзақұлы марапаттарды иелеріне табыстау кезінде карантиндік тыйым шараларының сақталатынын, бекеттер мен станциядағы теміржолшылар үшін марапаттардың жергілікті орындарда табысталатынын, ал Қызылорда, Сексеуіл локомотив пайдалану деполарында және Қазалы вагон пайдалану деполарының теміржолшылары үшін депо басшылығы марапаттарды барып табыстайтынын жеткізді. Сонымен қатар марапаттау рәсімі Қызылорда жол дистанциясы мен Қызылорда белгі беру және байланыс дистанцияларында да шағын құраммен аталып өтіліп, кәсіподақ ұйымы атынан мерекелік сыйлықтар қоса берілді.