Қызылордалық теміржолшылар жарты жылдық жоспарды 130% асыра орындады
Қызылорда облысы бойынша меншікті тілші
Жылжымалы құрамдардың қозғалыс қауіпсіздігін сақтауды арттыра отырып станцияның межеленген өндірістік жұмыс көрсеткіштерін орындауды мақсат еткен қызылордалық теміржолшылар жылдың алты айын табысты қорытындылады, деп хабарлайды Rail-news.kz. Табыс емей немене, белгіленген 836 вагонға жүк тиеу жоспарын 1094 вагонға жеткізіп, 130,86 пайызға асыра орындаған. 50341 тонна жүк тиеу межесі 69259 тоннаға жетіп, тиісінше жоспарды 137,57 пайызға жеткізген. Шілде айында станцияға келген жүк пойыздарынан 1629 вагонды ағытып, 2198 вагонды пойыздарға құрастырып тіркеген қызылор- далықтар 5276 вагоннан 287917 тонна жүк түсірген. Станция жұмысы жайлы мәлімет ұсынған Қызылорда станциясының техникалық бөлімінің инженері Мөлдір Дәулеткелдиева аймақтағы ахуалға байланысты әріптестерінің карантиндік шараларды қатаң сақтай отырып жұмыс істеп жатқанын жеткізді. – Жылдың алты айында 4,59 ваг/сағатқа белгіленген транзитті вагондардың бос тұру көрсеткіші де төмендеп, 3,33 вагон/сағатты құрап, жоспар 137,83 пайызға орындалды. Құжаттарын рәсімдеу кезіндегі транзитті вагондардың бос тұру межесі 10,24 ваг/сағ белгіленсе, есепті мерзімде көрсеткіш 10,03 ваг/сағ жеткізіліп, бұл жерде де жоспар 102,09 пайызға орындалған. Жалпы жылдың алғашқы жартысындағы өндірістік жұмысымызда олқылық болған жоқ. Бекітілген көрсеткіштер 94,44 -158,37 пайыз аралығында орындалды. Транзитті вагондардың құжаттары рәсімделмей бос тұрып қалу жағдайының да белгілі себептері болды. Көршілес бөлімшелердің құрамдарды қабылдамауынан вагондардың станцияда қалып қоюы мен локомотивтердің жетіспеушілігі өндірістік жұмысқа тосқауыл болды. Дегенмен алдағы уақыттарда бұл олқылықты жойып, жұмыс ырғағын бәсеңдетпеу үшін жұмыла жұмыс жасайтын боламыз, – деді техбөлім инженері Мөлдір Дәулеткелдиева. «Жұмыла көтерген жүк жеңіл» демекші, карантиндік шектеулерді қатаң сақтай оты- рып ауысыммен жұмыс жасайтын станция теміржолшылары кәсіби мерекелерін осын- дай толайым табыстармен қарсы алып, енді екінші жартыжылдықта да биік межелерді бағындыруға бел шеше кіріскен.