Атырау жүк тасымалы бөлімшесіндегі жұмыскерлердің жалақысы жартыжылдықта 25 мың теңгеге көбейген

Атырау жүк тасымалы бөлімшесі бойынша еңбек өнімділігі 108 пайызға орындалып, бір жұмысшының орташа айлық еңбекақысы жоспардағы 222 664 теңге орнына 248 199 теңгені құрап отыр, өсім – 25 535 теңге, деп хабарлайды Rail-news.kz. Ол ұжымдық шартқа сәйкес 0,5 АЕК пойыздық жұмыс үшін үстемеақы және локомотив бригадаларының жанар-жағармайды үнемдеуі есебінен болып отыр. Ұжымдық шартқа сай жұмысшылардың арнаулы киімдермен қамтамасыз етілуі де назардан түспейді. Биылғы жылы 1348 жиынтық костюм х/б, 134 каска, 997 жазғы бас киім, 1758 сигнал жилеті, т.б. қорғаныш құралдары жеткізілген. Қазіргі пандемия жағдайының күшеюіне байланысты жұмысшылар антисептик, маска, бір реттік қолғаптармен де қамтамасыз етілген. Еңбек қауіпсіздігі мен жағдайды жақсарту кешенді жоспарына сәйкес 10 шара жоспарланып, оның жетеуі орындалған. Сондай-ақ 22 млн 006 мың теңгеге кондиционер, қысқа толқынды пеш, диспенсер, мұздатқыш сынды тауарлар алынған. Яғни, жұмысшылардың еңбек жағдайын жақсартуға бөлінген қаражат өз мақсатында игеріліп, мақсатты жұмсалып отыр.