Тепловоздың жүруіне кедергі келтіріп жатқан жұлдызқұртты жою қарекеті басталды

Ақтөбе облысының Хромтау, Мұғалжар, Алға, Қарғалы, Мәртөк аудандарының аумағын жұлдызқұрт жайлады. Жәндіктер жеке компанияның кірме жолдарын басып қалған, деп хабарлайды Rail-news.kz. Әлеуметтік желіде теміржол бойын жайлаған жұлдызқұрттардың көптігінен тепловоздың жүре алмай жатқан видеосы тарап кетті. Онда машинист жәндіктерден жол майланып, дөңгелектердің тайғанап, жүре алмай қалғанын айтады. Оқиға Ақтөбе облысының аумағында болған.

«Желіде тараған видеомен таныспыз. Ақтөбе жол бөлімшесінің аумағына жәндіктерден қауіп болған жоқ. Оқиға Кемпірсай, Бадамша аумағындағы жеке компанияның кірме жолында болған. Қауіптің алдын алу үшін барлық жұмыстар жасалуда», – дейді Ақтөбе ЖТ бөлімшесі басшысының орынбасары Айбек Таласов.

Жәндіктердің тепловоз дөңгелектеріне жабысу оқиғасы Ақтөбе мыс компаниясының аумағында болды. Облыстық ауылшаруашылық басқармасы зиянкестермен күрес жұмыстары жүргізіліп, жағдайдың тұрақталғанын жеткізді. «Жаңбыр жауып, кейін күн қатты ысығанда осындай болады. Бұл 8-10 жылда бір қайталанатын жағдай. Фитосанитариялық диагностика және болжамдар-әдістемелік орталығы анықтаған аумақта ғана химиялық өңдеу жүргізіледі. Қазір 8 мың гектар жер анықталды. Оның дені шаруалар меншігінде. Талап бойынша шаруалар өз қаржысына өңдеу жүргізеді. Кейін қаржысының тең жартысы субсидияланады», – деді облыстық ауыл шаруашылығы басқармасының басшысы Исатай Есмағамбетов.