Күзгі комиссия жоғары баға берген шалғайдағы Жастар станциясы қысқа сақадай сай

Сарышағаннан бері, Мойынқұм даласына қарай алпыс шақырым қашықтықта Жастар станциясы бар. Төртінші класты, тірлігі – тап-тұйнақтай, шағын ғана мекеме. Тіршілік нышаны сезілмейтін құла дүзге қона салған Жастар станциясы жазық дала бетіндегі мең сияқты. Бір кездері мұнда елу-алпыс үй қоныстаныпты. Яғни, бір ауыл станциядан несібелерін айырған ғой. Егемендігіміздің алғашқы жылдары уақытша қиындықтар орын алып, станцияның шаруасы шатқаяқтаған. Әлгі елу-алпыс үйге жұмыс болып тұрған мекеменің мазасы кеткен соң, тұрғындар жан-жақққа көше бастаған.

«Қазіргі ахуалымыз жаман емес, теміржолда тіршілік жанданып, жұмыс көбейіп келеді. Шеткері отырсақ та, айналамызда ел-жұрт бар. Солтүстігімізде Сарышағанға қараймыз, оңтүстігімізде Мойынқұм жатыр. Ғимаратымыз ескі де болса, сүйегі мықты. Жылуымыз электр жүйесімен тарайды. Жұмыс істеуге барлық жағдай бар», – дейді станция басшысы Қуаныш Қуанышқалиев.

Станциядан Жамбыл жүк тасымалы бөлімшесінің барлық жүк пойыздары өтеді. Тек Жамбыл емес, күрежолдың бойында тұрғандықтан әрі бері қатынаған барлық жүк және жолаушы пойыздары бір тынбайды. Алматыдан Нұр-Сұлтанға қатынайтын, Қостанай, Көкшетау, Петропавл қалаларына бағыт алған бүкіл жолаушылар пойыздары да Жастар станциясын көктей өтеді. Пандемиялық ахуалға байланысты Екатеринбургке қатынайтын пойыз ғана тоқтап қалған. Басқасы бәз-баяғыша, жүріп жатыр. Төртінші класты мекеменің міндеті – құрамдарды қабылдау, жөнелту. Ешқандай түсіріп алу, тиеу операциялары атқарылмайды. Станция бастығынан бөлек екі кезекші бар. Бірі – Берік Қожабеков, екіншісі – Нұрсұлтан Домалақов. Жастары отыздың ар жақ, бергі жағындағы жастар. Іске икемді, ымырашыл, келісіп пішіп, мекеменің жұмысын дөңгелетіп отыр. Станция бастығы Сарышағаннан, ал екі кезекші Мыңарал станциясынан қатынап жұмыс істейді екен. Сонымен қатар мұнда ШЧ, ПЧ мекемелерінің екі жолшысы, екі электромонтеры де вахталық әдіспен еңбек етеді.

«Пойыз деген ағылып жатыр. Кедергісіз өткізіп отырамыз, ешқандай мәселе туындамайды. Тек бұл жақтың табиғаты бөлек: қысы – қатал, жазы – аптап ыстық. Оған да үйреніп алғанбыз. Басшылық тарапынан барлық жағдайымыз жасалған. Қысқы-жазғы арнайы киімдеріміз бар, құрал-жабдықтарымыз сайлаулы», – дейді Жастардың жігіттері.

Ауыз су мәселесі мұнда тасымалмен шешілген. Яғни, айына екі мәрте Мойынқұмнан тұщы су толтырылған цистерналар жол бойы Ақжолтай, Қашқантеңіз, Қаражыңғыл станцияларын сумен қамтамасыз етіп, Жастар станциясына келеді. Судан тапшылық жоқ, жеткізілген бір цистерна су барлық қажеттілікке жететін көрінеді.

«Жақында өткен күзгі комиссиялық бақылау жұмысымызға жоғары баға берді. Ешқандай кемшілік табылған жоқ. Алдағы қысқа да дайындығымыз тастүйін», – деді Жастар станциясының бастығы нық сеніммен.