Шиеліде жүк тасымалын арттыру үшін жергілікті іскерлермен келіссөздер жүріп жатыр
Қызылорда облысы бойынша меншікті тілші
Өткен жылы өндірістік жұмыс жоспарларын жоғары нәтижемен аяқтаған шиелілік теміржолшылардың биылғы қарқыны да жаман емес. Станциядан оңтүстік пен батыс арасында жөңкіген транзиттік пойыздар легі күндіз-түні бір тынған емес.
Өткен жылдың өндірістік жұмыс көрсеткіштері 102-245 пайыз аралығында орындалып, маневрлік, пойыздық жұмыстар барысында тосын жағдайларға жол берілмеген. Станция бастығының орынбасары Нұрғали Әбжаппаров межелі жұмыстарды орындау барысында кедергі жоқ екенін білдірді. Қазіргі кезде жергілікті жүк жөнелтушілерді тарту мақсатында аймақтағы сауда мекемелері мен жеке кәсіпкерлермен келіссөздер жүріп жатыр екен.
Шиелілік теміржолшылардың өткен жылғы табысына станцияның бүкіл ұжымы ортақ. Десек те, 20-30 жылдық тәжірибесі бар пойыз құрастырушыларының еңбегі ерен. Олар өткен жылы 510 пойыздан 20334 вагонды ағытып, 650 пойызға 23866 жүк вагонын тіркеген. Ең бастысы, жұмыста ешбір апат, бақытсыз оқиға, жарақат алу жағдайы тіркелмеген. Кәсібилік деген осы емес па?! Бұдан бөлек, станция кезекшілері, осынша пойыз бен вагонның құжаттарын рәсімдейтін кеңсе, касса жұмысшылары, жүк қабылдап-тапсырушылар жұмысы да аса жауапты. Дегенмен, айналып келгенде бәрі ортақ мақсат жолында тер төгетін станциялықтар ұстанымы – «бірлік түбі – тірлік», өйткені табыспен қатар абырой да ортақ.