Тұманды бекеті заманауи құралдармен жабдықталған

Атырау темір жолына қарасты Тұманды станциясы шағын болса да шаруасы мығым бекет. Станцияда қозғалыс қызметін қамтамасыз етіп отырған кезекшілер, вагон қараушылар, белгі берушілер мен электромеханиктер, жолшылар бір кісідей жұмыла еңбек етуде.

Атырау сигнализация және байланыс дистанциясының қызмет көрсету аясының жалпы ұзындығы 293 6 шақырымды құрайды. Яғни, ол Атырау мен Д.Нұрпейсова станциялары аралығын қамтиды. Осы аралықта 22 станция бар. Ол станцияларда 274 бұрма, 689 сигнал, екіжақты 294 сигнал электрлендірілген орталыққа қосылған. 25 өткел АПС құралымен, ал барлық шағын бекеттер АЛСН қондырғысымен жабдықталған. Солардың бірі – Тұманды бекеті. Станция кезекшісі Өтепов Жомарттың айтуынша, мұнда барлық байланыс және белгі беру құралдары орнықты жұмыс жасап тұр. Станция арқылы тәулігіне 10 жүк және екі жолаушылар пойызы өтеді. Солардың бәрін қабылдау, өткізу ең алдымен байланыс және белгі беру жүйесінің дұрыс жұмыс жасауына байланысты. – Бүгінде заманға сай барлық құралдар электрлендірілген және цифрлық басқаруға көшуде. Мәселен, КТСМ қондырғысы жүріп келе жатқан пойыз доңғалақтарының ақауын тез тауып, көрсетеді. Бәрі мына алдымыздағы компьютерде тайға таңба басқандай көрініп тұрады. Сол секілді бағдаршам, бұрмалар, басқада құралдар жұмысы үнемі назарымызда. Цифрлы тікелей байланыс та орнатылған, онымен өз өңіріміз түгілі, астанадағы теміржол мекемелерімен де, басшылықпен де сөйлесе аламыз, – дейді ол. Жомарт Өтепов станция ашылғалы бері осында электромеханик болып жұмыс істейді. Компанияның оңтайландыру және өндірістік қызметтерді біріктіру саясатына орай бүгінде станция кезекшісі қызметін де қоса атқаруда. Ол үшін арнайы қосымша білім алып, сынақтан өткен. Өндірістік қызметтерді біріктіруге байланысты пікірін сұрағанымызда, ұқсас қызметтерді оңтайландыру арқылы біріктіруге болады, егер ол теміржолшы үшін артық жүктеме болмаса деп жауап берді.