Сұлутөбе станциясының тынысы: жұмыс азайған

Қызылорда темір жолына қарасты Сұлутөбе станциясы бір кезде өндірісі қайнаған, жүк тиеу-түсіру жыл он екі ай жүргізіліп, жұмысы қызып жататын станция еді. Бүгінде бекет тынысы марғау, қимылы да бәсеңдеген.

Алайда үлкен магистраль бойында жатқан станциядан 14 жұп жүк пойызы мен 6 жұп жолаушылар пойызы кесте бойынша өтіп жатыр. Алаштың арысы Мұстафа Шоқайды дүниеге әкелген Сұлутөбенің іргесінде М.Шоқай ауылы тұр. Жергілікті тұрғындар жұмыссыздық салдарынан қалаға ағылу үрдісі бұл ауылды да айналып өтпеген. Урбанизация кесірі бір кезде дөңгеленген тірлігі бар елдімекенді сиретіп, болашақта бекеттің де жабылып қалу қаупі туындауы мүмкін. Өйткені, станцияның бүгінгі тіршілігі тек пойыздарды күтіп алып, шығарып салумен шектеліп тұр. Ара тұра бірен-саран жергілікті кәсіпкерлер тұрмыстық көмір, тағы басқа тұтыну заттарын түсіретіні болмаса, басқа жүк тиеу-түсіру операциясы жоқтың қасы. Кезінде маусым сайын бірнеше ауысыммен бақша өнімдерін сұрыптап, қауын-қарбыз тиеу, оны жәшіктеп вагонға арту секілді жұмыстардан теміржолшылар әсіресе жаз бен күз айларында сүрлігіп жататын... 

Станция бастығы Ерболат Тілеубаев өндірістік жүк тиеу-түсіру жұмыстары жүр- гізілмейтіндіктен қазір 4-сыныпты шағын станция болса да жергілікті теміржолшылар өз міндеттерін мінсіз атқарып отырғанын айтады. Пойыздардың қозғалыс қауіпсіздігін сақтауға станциялықтармен қатар жолшылар, электрмен жабдықтаушылар, белгі беру және байланыс дистанциясы мен вагоншылар өз үлестерін қосуда екен. 

– Сұлутөбе шағын станция болғанмен негізгі магистральдың бойында жатқан соң өткінші пойыздар көп, сондықтан біздің жауапкершілігіміз кемімейді. Кесте бойынша бекеттен өтетін пойыздардың қауіпсіздігіне қатысты еш кінәрат жоқ, барлығы жоспар бойынша жүргізіліп келеді, – дейді станция кезекшісі Асқар Жаулыбаев. 

Шағын бекет ұжымы алдағы күндерден үмітті. Аймақта жүк көбейіп, тасымал артатын күн туса, Сұлутөбе де қайта түлер еді деп армандайды.