Сарыағаш станциясы – айрықша мәртебеге ие
Қазақ-өзбек шекарасында түйіспе станция рөлін атқаратын Сарыағаш – айрықша мәртебеге ие. Нышанбай Серікбаев осы станцияның коммерциялық тексеру пунктінде аға жүк және багаж қабылдап-тапсырушы болып жұмыс істейді. Қырық жылдан астам еңбек өтілі бар майталман биыл «Құрметті теміржолшы» белгісімен марапатталды.
Тәжірибелі теміржолшы шекаралық станцияда жұмыс істеудің өзіндік ерекшелігімен бөлісті. Қазіргі таңда Өзбекстанға Қазақстаннан кететін пойыздарды қабылдайтын ауысым жетекшісінің қарамағында 6 жүк қабылдап-жөнелтуші бар.
– Күніне 8-15 пойызды қабылдаймыз. Вагондар тоқтап, электр жүйесі толық өшірілгеннен кейін тексеруге кірісеміз, пломбасы қалай, ақаулықтары, тесіктері, жырылған-сырылған жері жоқ па, мұқият қарап шығамыз. Қандай да бір кемшілік табылып жатса, актпен тіркеп тапсырамыз. Өзбекстаннан көбіне мақта, тыңайтқыштар келсе, Қазақстаннан ол жаққа бидай, Ресейден ағаштар жиі өтеді. Екі ел арасындағы транзиттік жұмыс көлемі жылдан-жылға ұлғайып келеді. Соған орай жұмыс көлемі де артып, станция ауқымы кеңейіп жатыр. Бұл – теміржолшылар үшін жақсы нышан. Түйісу бекеті болған соң жұмыс өзге станцияларға қарағанда күрделі, себебі көрші елдің теміржолшыларымен қоян-қолтық жұмыс істеу қажет. Жай ғана жұмыс істемей, барынша жауапты, арнайы нұсқаулықтан ауытқымай, регламентті сақтап жұмыс істеу қажет. Шекаралық станция болған соң осындай қарым-қатынас қағидатын сақтамай болмайды, – дейді тәжірибелі теміржолшы.
Келесі жылы зейнетке шығатын Нышанбай Серікбаев Шеңгелді станциясында теміржолшы отбасында дүниеге келген екен. Әкесі Өрісбай өмір бойы тепловоз машинисінің көмекшісі болған. Сондықтан болар, үш ұлы да алысқа ұзамай әке кәсібін жалғаған. Кейіпкеріміз алғашын да коммерциялық ақауларды жөндеуші болып тәжірибе жинайды, кейіннен пойыз қабылдаушы болады. 1982 жылдан бастап аға пойыз қабылдаушы. Түйісу станциясы мәртебесі Шеңгелдіден Сарыағашқа ауысқан соң 2005 жылы Нышанбай Өрісбайұлы да басшылықтың қалауымен курортты аймақтағы ерекше мәртебеге ие болған станцияға ауысып, еңбек жолын жалғастырады.
Салада жоғары немесе арнаулы орта білімі болмаса да, сан жылдық тәжірибесі оны абырой биігіне көтерді. Адал еңбегі үшін ҚР Президентінің Құрмет грамотасына ие болды. Ал биыл «Құрметті теміржолшы» белгісін Компания басшысының өз қолынан алды.
Бүгінде бес баласының екеуі – теміржолшы. Бірі әскерилендірілген күзетте, екіншісі машинист болып еңбек етеді.