Теміржол көлігін пайдаланушылар артып отыр
Қызылорда облысы бойынша меншікті тілші
Белкөл станциясының теміржолшылары үшін биылғы жыл табысты болғалы тұр. Жыл басынан бері станциялық және маневрлік жұмыстар кезінде пойыздар қозғалысы қауіпсіздігінің бұзылуына жол берілген жоқ.
Пайдалану көрсеткіштері де көңілден шығады. Станциядан тек қыркүйек айында 49 вагонға 3136 тонна жүк тиеліп, жоспар 91 пайызға орындалған. Сондай-ақ, 500 вагоннан жүк түсіру межесін 669 вагонға жеткізіп, жоспарды 134 пайызға артығымен орындаған.
Станция бастығы Кенжебек Өтегенов қыркүйек айындағы көрсеткіштер осы болса, тоғыз айда ол 96-188 пайыз аралығын құрағанын жеткізді. Мысалы, 4970 вагоннан жүк түсіру жоспары 9319 вагонға дейін жеткізіліп, меже 188 пайызға орындалған.
– Жоспардың өз деңгейінен асыра орындалуынан-ақ Белкөлге келетін жүктің көбейгенін байқауға болады. Яғни, теміржол көлігін пайдаланушылар артып отыр. Және де тапсырыс берушілер мен станция теміржолшыларының жоғары деңгейде ынтымақтасып жұмыс жасауының нәтижесінде бірде-бір вагонды шашау шығармай, бекітілген жұмыстар уақытылы орындалуда, – деді станция бастығы.
Ұжымды алға сүйрейтін кәсіби мамандар Белкөлде де аз емес. Олардың қатарын станция бастығының орынбасары Ербол Сембиев, жүк қабылдап-тапсырушы Ғазиз Қыстаубаев, тауар кассирі Нәзипа Бұлтбаева, станция кезекшісі Бақытжан Назаров, кезекші жанындағы оператор Сәбит Тобашев сынды теміржолшылар толықтырып отыр.