Әндері хитке айналған теміржолшы
Маңғыстау облысы бойынша меншікті тілші
Болашақ станциясының тұрғыны, «Теміржолсу-Маңғыстау» мекемесінің шебері Бақытжан Битиковті жерлестері «біздің жұлдызымыз» деп мақтан тұтады. Расымен, ол – болашақтықтардың ақыны, сазгері мен әншісі, ауыл-елдің бірде-бір мерекесі онсыз өтпейді.
Өлеңнің сөзін де жазып, әнін де шығарып, оны домбырамен мақамына келтіріп орындайтын жігітті «сегіз қырлы, бір сырлы» десе болғандай. Дегенмен, кәсібі теміржолшы болғасын өнердің соңына түсіп, жұлдыз болуға ұмтылған емес. Ауылдастары мен әріптестерінің қолқалауымен арагідік түрлі байқауларға қатысып, бағын сынайды.
– 2016 жылы Астанада өткен халықаралық «Жарық жұлдыз» авторлық ән байқауына қатысып, диплом алдым. 2018 жылы Қазақстан авторлары мүшелігіне өтіп, 2019 жылы Алматы қаласында Әлем бейбітшілік қоғамының «Өнерге үлес қосқаны үшін» медалімен марапатталдым. Былтыр желтоқсанда «Шайыр Шынберген» I республикалық ән байқауынан «Серіден сыбаға» аталымы бойынша бірінші орын алдым. Дегенмен соңына түсіп өнер қумақ ойым жоқ, ауыл-елге қызмет етсем болды, кейде әлеуметтік желіге жүктеп қоятыным ғана бар, – дейді Бақытжан Битиков.
Болашақ станциясымен болашағын байланыстырған кейіпкеріміз – төрт перзент тәрбиелеп отырған жарасымды отбасы иесі.
Әндері хитке айналған теміржолшы Бақытжан Битиковтің Болашақ станциясы жайлы шығарған әнін тыңдай отырыңыздар: