Семейлік теміржолшылар асарлатып жатыр
Абай облысы бойынша меншікті тілші
Семей жүк тасымалы бөлімшесінің теміржолшылары атадәстүрді жаңғыртып, игілікті шараны қолға алды. Олар тез бітуі тиіс құрылыс нысандарының жұмысына асарлатып кірісуде.
Алғашқы шара жуырда тораптық Шар станциясында қолға алынды. Өзге мекемелердегі әріптестерін асарға шақырғандар семейлік вагон шаруашылығының теміржолшылары жуырда Шардан өз қызметкерлеріне арнап жұмыс арасында ас-суын ішіп, демалып, қыстың аязды, қарлы боранды күндері жылынатын шағын үйшік құрылысын қолға алған еді. Негізгі ұйымдастырушы – салалық кәсіподақ ұйымы.
Асарға Шар станциясының бастығы Бейімбет Бейбітұлы бастаған қозғалысшылар, теміржол вокзалының қызметкерлері және кәсіподақ белсенділері білек сыбана қатысты. Құрылыс орнына алғашқы болып қазық қаққан ВЧД-23 мекемесінің басшысы Ерзат Хасенов пен депоның кәсіподақ төрағасы Ертай Темірбеков те жаңа нысанның іргетасын бірге құйысты. Алдағы уақытта өзге де салалас мекемелердің өкілдері құрылысқа атсалысып қол ұшын бермек.
– Шардағы вагон қараушыларға арналған үйшік бұрыннан қажет болып жүр еді. Басшылықпен кеңесе отырып, асар дәстүрімен құрылыс жұмыстарын қолға алдық. Материалдардың барлығы өз мекемемізден. Өзге ұжымдардан келген әріптестеріміз құрылысына жәрдемдесуде. Нысанды алдағы теміржолшылар мерекесіне дейін бітіруді көздеп отырмыз, – дейді Семей вагон пайдалану депосының бастығы.
Вагоншылар басқаларға «қарыз» болып қалмасы анық. Олар Шардағы станция, вокзал, локомотив шаруашылығының теміржолшыларына кез келген іс-шараны жүзеге асыруда көмек көрсетуге әзір екендіктерін жеткізді.