Атырауда байланыс желілері жаңартылуда

Қозғалыс қауіпсіздігінің байланыс саласында да маңызы зор екені белгілі. Өткен төрт айда өңірдегі белгі беру-байланыс дистанцияларындағы қондырғыларға техникалық қызмет көрсету «жақсы» деп бағаланып, ақау болмаған.  

Қазіргі уақытта қондырғыларды жөндеу және жаңарту жұмыстары жалғасып   жатыр. Ең алдымен байланыстың бекем болуы тоқ өткізгіш сымдарға, яғни кабельдерге байланысты. Соған орай Атырау, Ақжайық және Құлсары дистанциялары бойынша 16,076 шақырымдық орта оқшаулы кабельдер жөнделіп, Д.Нұрпейісова, Афанасьев, Исатай, Нарын, Аққыстау, Тұманды бекеттерінде 28 шақырымдық КТСМ-02 байланыс желісі төселуде. Сондай-ақ 38 дана электржетек жөнделіп, 47 дана АБ белгі беру сымы, 46 дана жол қорабы, 13 батарея шкафы, 599 дана аккумулятор ауыстырылып жатыр.  

Атырау – Сағыз телімін қамтитын және өз учаскесінде 19 станция, 15 өткел және 5 диспетчерлік айналымға қызмет көрсететін Ақжайық белгі беру және байланыс дистанциясы бойынша Мақат станциясының екі жағынан, Жамансор, Мұқыр, Жантерек, Ескене және Теңдік станияларында қорғалатын, күзетілетін, автошлагбаумы бар барлығы 7 өткел салынды. Бүгінде дистанция 22 өткел жұмысын қадағалап отыр. Яғни, жүрдек пойыз келе жатқанда оның жолын кесуі мүмкін жағдайлар болмайды. Мәселен, 1,5 шақырым бұрын басқа жолдардың бәрі жабылып, шағын станцияларда белгі беру құралдары дыбыс бере бастаса, үлкен станцияларда пойыздың келе жатқаны репродуктор арқылы хабарланады. Жолда жұмыс жасап жүрген не басқа да адамдарға пойыздың келе жатқаны туралы ескерту беріледі. Қондырғылар, кабельдер мен электрожетектер жаңартылғаннан кейін пойыздың жүріп өту сигнализациясы 140 шақырымға қайта есептелді, пойыз өту үшін маршрутты екі учаскеден бұғаттау, сол аралықта жол монтерлеріне белгі беру қондырғыларын орнату жұмыстары да сәтті жүргізілді.  

Атырау-Ганюшкино телімін қамтитын Атырау белгі беру және байланыс дистанциясы өз учаскесінде 15 станция, 10 өткел және 5 диспетчерлік айналымға қызмет көрсетеді. Байланыс қалыпты болу үшін қондырғылар мен құралдар, оларға қажетті қосалқы бөлшектер уақытылы жаңартылып, ауыстырылып отыруы тиіс. Соған орай, Ганюшкино, Махамбет, Исатай, Аққыстау, Тумманное, Д.Нұрпейісова, т.б. станция-разъездерде релелік шкафтар, ТШ-2000 релелері ТШ-65-ке, жерүсті кабельдері жерастына, КТСМ қондырғылары жаңасына алмастырылып, белгі беру мен байланысты жақсарту мақсатында ауқымды жұмыстар жүргізілуде. Құлсары дистанциясында 3 релелік шкаф, 5 батарея шкафы жаңасына ауыстырылып, 465 және 467-разъездерде абаттандыру жүргізіліп, брусчатка төсеу жұмыстары жасалып жатыр.