Төретам станциясының бүгінгі жай-күйі
Қызылорда облысы бойынша меншікті тілші
Қызылорданың солтүстігіндегі Төретам станциясында бүгінде жұмыс азайып, тіршілік саябырсыған. Жыл басынан бергі бес айдың ішінде 292 вагонға жүк тиеліп, 531 вагоннан жүк түсіріліп, тапсырыс берушілерге тапсырылған.
Бұл – бір қарағанда аты әлемге танымал станция әлеуетіне қораштау көрінгенмен, жергілікті теміржолшылар үшін жаман көрсеткіш емес. Себебі баяғыдай космодром қалашығына ағылып жататын жүк жоқ, станцияда жұмыс саябырсып, соған орай штат та азайған. Станция бастығы Нұржан Бекжанов дегенмен әр айға бекітіліп берілген тапсырмалар орындалып, өндірістік көрсеткіштер межеге жетіп отырғанын жеткізді.
– Жыл басталғалы да, өткен жылы да жылжымалы құрамдарды станцияның қабылдап-жөнелту жолдарында кідіртіп қабылдау, кешіктіріп жөнелту жағдайлары болған жоқ. Маневрлік, пойыздық және өндірістік жұмыстар кезінде вагондарға залал келтіру, станция теміржолшыларының әсерінен пойыздардың қозғалыс қауіпсіздігінің бұзылу жағдайы тіркелген жоқ, – деді станция бастығы.
Ауысыммен жұмыс жасайтын төретамдық теміржолшыларды таңертеңгілік пысықтау иструктажынан өту барысында жолықтырдық. Әрі қарай станция кезекшісі Әлібек Залқараевтің сілтемесімен станцияның қызметін тұрақты пайдаланатын тапсырыс берушілер: «Цэнки» АҚ, «Ктж экспресс» және «Мир-2001» мекемелерінің кірме жолдарынан алынып құрамға тіркелуі немесе ағытылуы тиіс жүк вагондарын пойыз құрастырушылардың көмегімен ретке келтіру жұмысы басталды. Аға жүк қабылдап тапсырушы Қайырбек Төремұратов пен жүк және багаж қабылдаушы Бақытгүл Темірашева бекетке аялдаған вагондардан жүктерді қабылдап алып, аға тауар кассирі Марина Жалекеева мен тауар кассирі Жеңісгүл Айтбаева жүк құжаттарын тіркеп, есепке алуда. Ал техконтордың операторлары Мира Жалиева мен Күлән Ахаева вагондағы жүктердің техникалық құжаттамаларын рәсімдеумен айналысуда. Қысқасы, жұмыс көлемі азайса да, бекеттегі тынымсыз тіршілік тоқтаусыз жүріп жатыр...
Ауысым арасындағы демалыс күндері станция теміржолшылары техникалық, теориялық білімдерін жетілдіру дәрістеріне қатысып, бекет басшылығы кестеге сай комиссиялық және айлық тексеріс, тосын тексеріс секілді қауіпсіздік шараларын тұрақты жүргізіп отырады.
