Ақжайықта 60 кірме жол бар

Ақжайық станциясы - Атырау қаласының ортасында орналасқан станция. Жүк тасымалын орындауда өзіндік орны бар, толық  мүмкіндігімен жұмыс істеп келеді. Соңғы жылдары өнім көлемін ұлғайтқан Атырау мұнай өңдеу зауыты көлік инфрақұрылымын дамыту инвестициялық бағдарламасына сәйкес, зауыт ішінен «Промышленная станция» салып, зауыттың кірме жолын Теңдік станциясымен жалғады.  

Енді вагон-цистерналар зауыттың сұрыптау станциясы арқылы өткізіліп, ол вагондар Ақжайық станциясына соқпай, айналып өтеді. Ал бұл Ақжайықтың құрамаларды тарату және құруды өз жылжымалы құрамымымен қамтамасыз етуге мүмкіндік берді. Яғни, жұмысы жеңілдеді. Станцияның 7 қабылдап-жөнелту, 3 тұрақтау жолы бар. Маневр жұмыстары станция ішінде жасалады, ол екі маневрлік тепловозбен атқарылуда. Станцияның бұрынғыдай Атырау мұнай өңдеу зауытымен тікелей қарым-қатынасы болмағанына қарамастан, жүк көлемі кемімеген. Станциядан күніне 2-3 пойыз, 100-150 вагон қабылдап-жөнелтіледі, жолдары қысқа, дөңесі жоқ станция үшін бұл аз емес, әсіресе жүк тиеу мен түсіру көлемі артып кеткен кезде қиын. Жалпы, қалаға келетін жүктің 60 пайызы аталған станцияға тиесілі. Биылғы жарты жылда барлығы 571 пойыз, 12570 вагон қабылданыпты.  

Станция бастығы Бағытжан Абрахмановтың берген мәліметіне сәйкес, өткен алты айда жоспар межеден көріне алды. Мәселен, вагон айналымы 198,65%-ға орындалды. Орташа тәуліктік жүк тиеу көлемі жоспарда тәулігіне 2 вагон болса, ол іс жүзінде 4 вагон болып, 200% орындалған. Тоннамен есептегенде станция арқылы тәулігіне 202 тонна жүк тиеліп, жоспар 100  пайызды құрапты. Өңірдегі мұнай компанияларының тоқтаусыз жұмыс жасауы тасымал көлеміне оң әсер етіп тұр. Ал, жүк түсіру тәулігіне 47 вагон болса, ол 70 вагон болып 149 пайызға жетті. Атырау аймағында «Ақтөбе-Атырау-Астрахань»,  «Миялы-Қарабау-Индер» автожолдарында құрылыс жұмыстарының қарқынды жүруі де жүк көлемі мен салмағының артуына ықпал етіп отыр. Жергілікті вагонның бір жүк операциясына тұруы да 148 пайызды құрап, жоғары көрсеткішке жеткен.  

Ақжайық станциясына қарасты жүк түсіріп-тиейтін 60 кірме жол бар, солардың нақты қолданыстағысы - 54. Олардың қатарында   құрылыс материалдарын қабылдайтын «Атыраутемірбетон», «УПТК», «Жариков», Ақтөбе ЛСИ» ЖШС, тамақ өнімдерінің «КДК», «Мәдина», «АЛК», «ТНП», «Амистас», т.б. жолдар бар. Олар қаланың әр түкпірінде орналасқан. Соған сай әркім өзіне қолайлы деген кірме жолдан қажетті жүктерін түсіріп ала алады. Міне, осы кірме жолдарда түсіріліп жатқан жүк көлемі де айтарлықтай. Басқа станциялар сияқты мұнда тек мұнаймен ғана жұмыс жасамайды, цистерналарға бензин, мазут, реактивті отын құйылады, еліміздегі ауыл шаруашылығы мекемелеріне тапсырыс бойынша дизель отыны жіберіледі, халық тұтынатын тауарлар да осында келеді. «Жалпы, станция  жұмысы қалыпты, қазіргі уақытта жүк тасымалының көлемі де көңілден шығады», дейді станция бастығы.