Шиелі станциясы – өндірістік бекет
Қызылорда облысы бойынша меншікті тілші
Аймақ теміржолының дамуында өзіндік орны бар Шиелі станциясы – өндірістік бекет. Орынбор – Ташкент күрематыр магистралінің бойында жатқан көне станция арқылы арыбері жөңкілген жүк және жолаушы пойыздарында есеп жоқ.
Шиелілік теміржолшылар жыл басынан бері өздеріне бекітілген міндетті тапсырмаларды көтеріңкі көрсеткішпен орындауда. Сегіз ай ішінде негізгі көрсеткіштер жоспары 106-140 пайыз аралығында жүзеге асырылып, теміржолшылардың сүбелі еңбегін паш еткен.
Шиелі станциясында атқарылған жұмыстар желісімен таныстырған бекет басшысының орынбасары Нұрғали Әбжапбаров еңбекқор ұжымның көздеген мақсаты өткен жылғы межеден асып, биылғы жылды табысты қорытындылау екенін жеткізді. Сегіз айда 11291 вагоннан жүк түсіру межесі 12250 вагонға жеткізіліп, жоспар 106 пайызға жеткен. Станцияға келген 334 пойыздан 17725 вагон ағытылып, 302 пойыз құрастырылып, оған 14919 вагон тіркелген. Станция маңына шоғырланған өндіріс орындарының күнделікті тіршілігінде теміржол көлігін қолдануы мен аудандағы кәсіпкерлермен тығыз қарым-қатынас орната білуі де шиелілік теміржолшылардың басты назарындағы мәселе.
Шиеліге келіп-кетіп жатқан сансыз көп құрамды кесте бойынша қабылдап-жөнелтіп, олардан керекті вагонды ажыратып алып, бүкіл қозғалысты реттеп отырған станция кезекшісі Есен Мырзағұлов пен станция кезекшісі жанындағы оператор Гүлзира Жүсіпованың еңбегі ерен. Сондай-ақ жүк құжаттарын рәсімдеуде информатороператор Роза Қойшыбаева мен жүк қабылдап-тапсырушы Азамат Аханбектің, іс жүргізуші Бағжан Нұртазаеваның да ортақ іске қосып отырған үлесі мол.
– Станция теміржолшылары жыл басынан бері пойыздық және маневрлік жұмыстар кезінде жылжымалы құрамдардың қозғалыс қауіпсіздігі бұзылуына жол берген жоқ. Теміржолшылардың әлеуметтік-тұрмыстық мәселелері шешілген, маусымдық киімдермен толық қамтылған, ұжымдағы ахуал жақсы. Өндірістік жұмыстардың тиісті деңгейде ұйымдастырылуына басымдық беріледі. Мақсат – ағымдағы жылды тосын жағдайсыз өткізіп, қомақты көрсеткішке қол жеткізу, – деді станция басшысының орынбасары Нұрғали Жүрсінұлы.
