Жалағаш станциясында өндірістік көрсеткіш жаман емес
Қызылорда облысы бойынша меншікті тілші
Орынбор – Ташкент магистарлінің бойында жатқан Жалағаш станциясында бүгінде елуге жуық теміржолшы еңбек етеді. Жүк және жолаушы тасымалының қауіпсіз қозғалысын қамтамасыз етумен қатар, аудан экономикасының ілгерілеуіне үлестерін қосып отыр.
Теміржолшылардың тұрмыстық қажеттіліктері қарастырылған, маусымдық киімдермен толық қамтылған, ауысымаралық техникалық сабақтар кестемен өткізіліп, пойыздардың қозғалыс қауіпсіздігін арттыру бағытындағы жұмыстар тұрақты атқарылады.
Компания бойынша теміржол саласын жетілдіру, жаңартып-жаңғырту бағытындағы бірқатар жұмыстар Жалағаш станциясында да қолға алынуда. Бұл салада еңбек еткен адамдарға аса зор жауапкершілік жүктеліп отыр.
– Жалағаш станциясының 11 айдағы өндірістік көрсеткіші жаман емес, 26 вагонға жүк тиеліп, 1200 вагоннан жүк түсіріліп, жоспар артығымен орындалды. Жүктерді түсіру және тиеу жұмыстары бір сәт кідірген емес. Жүк вагондарының ахуалын қадағалап, оларды жетектен дер кезінде ағыту, тіркеу жұмыстарын мінсіз атқарып отырған станция қызметкерлерінің қатарында аға жүк қабылдаушысы Айгүл Абенова, станция кезекшілері Махсут Ахатов пен Болатбек Тұрлашовдың еңбегін ерекше атап өткен жөн болар еді. Олар жас мамандарды тәрбиелеуде де жетістікке жетіп жүр. жоғарғы білімді, өз жұмысын жақсы меңгеріп жүрген тиянақты да тыңғылықты ісімен көпшіліктің көңілінен шығып жүрген жас маман Айнұр Кішкенбаева салалық кәсіптің қыр-сырын игеріп келеді, – дейді станция бастығы Айбек Қасымов.
Айбек Сәндібекұлы бөлімше басшылығы бекітіп берген межелі жұмыстардың үдесінен толық шығып отырғандарын, жылды жақсы көрсеткіштермен қорытындылауға барлық алғышарт бар екенін жеткізді.
Станцияға Алматы – Ақтөбе, Алматы – Атырау, Маңғыстау – Алматы, Қызылорда – Павлодар бағыттарындағы жұп жолаушылар пойыздары аялдап, аудан халқынынң теміржол көлігіне деген сұранысын толық қанағаттандырып отыр.
