Көне вокзал жаңа кейіпке енді (Фото)

Қызылорда станциясының теміржол вокзалы – тәулігіне мыңдаған жолаушыға қызмет көрсетіп, халықтың теміржол көлігін пайдалану қажеттілігін толығымен қанағаттандырып отырған қаланың бас қақпасы.

Сонау Орынбор-Ташкент магисталімен қатар 1905 жылы салынған көненің көзі ескі ғимаратқа қосымша 1969 жылы салынған ғимараттан тұратын нысан желтоқсан айында күрделі жөндеуден өткізіліп, пайдалануға берілді. Аймаққа жұмыс сапарымен келген Көлік министрі Марат Қарабаев тарихи нысанды аралап көріп, жүргізілген жұмыстарға бағасын берді. Қызылорда магистральдық желі бөлімшесінің директоры Ибраким Басықараев министр мен облыс әкіміне ғасырдан аса тарихы бар теміржол вокзалы ғимаратына жүргізілген күрделі жөндеу жұмыстарымен қатар жолаушыларға көрсетілер сервистік қызмет түрлері туралы ақпарат берді.  

Қызылорда облысы әкімінің ұсынысымен, ҚТЖ Басқарма төрағасы Н.Сауранбаев пен Магистральдық желі дирекциясы филиалының бастығы  С.Рахметовтің  қолдауымен вокзалдың қос ғимаратына ағымдағы және күрделі жөндеу жұмыстары аясында  қауіпсіздік деңгейін арттыру шараларына баса мән берілген. Станция әкімшілігі 3 тексеру жабдығының жиынтығын, бірқатар біріктірілген қауіпсіздік жүйесін орнатты. Құрылыс жұмыстары облыс әкімшілігі мен «ҚТЖ» компаниясы басшылығының қолдауымен «Интеграстрой», «Бірсүгір» серіктестіктері мен бірнеше жергілікті демеуші мекемелердің атсалысуымен атқарылды.  

– Компания басшылығының тапсырмасына сәйкес құрылыс жұмыстары жергілікті атқарушы билік пен бөлімшесі басшылығының бақылауымен жүргізілді. жолаушылар пойызы қабылданатын станциялық екі жол платформасының беткі қабатына асфальт жабындысы салынды. Қосымша жолаушылардың қауіпсіздігін сақтау мақсатында платформаға жарық шамдары, перрон бойына жолаушыларға арналған орындықтар орнатылды. Вокзал ғимараттары еденінен бастап шатырына дейін сапалы құрылыс материалдарымен жаңартылды, – дейді директордың вокзал шаруашылығы жөніндегі орынбасары Нұрлан Бимұратов.

Сонымен қатар 1905 жылы іргесі қаланған көне ғимараттың ішіндегі вокзал қызметкерлерінің анықтама, диктор, кезекші және тұрмыстық бөлмелердегі құрал-жабдықтар да толығымен жаңартылыпты.  

– Вокзалдың ішіндегі касса бөлмелері, күту залы, қызмет бөлмелерінің еденіне дейін жаңадан кафель төселді. Дауыс зорайтқыштар, диктор микрафондары да жаңарды. Су жаңа ғимаратта жаңа құрылғылармен жұмыс жасаудамыз, – деп қуанышымен бөлісті  вокзал кезекшісі Рая Қуандықова.

Иә,  күрделі жөндеуден өткен тарихи ғимараттың іші ұядай жылы, жұмыс бөлмелерінің еңсесі биік әрі жарық болғандықтан жолаушыларға жасалатын қызмет те сапалы, тиянақты болмақ. Мұнда жолаушылар тасымалы қалааралық, облысаралық және халықаралық бағыттарда жүргізіледі. Компания тарапынан мүмкіндігі шектеулі жандар үшін вокзалда ұсынылатын сервистік қызметтерді пайдалануға ешқандай кедергі жоқ.