Студенттер Тараз станциясына экскурсия жасады
"Қазақстан теміржолшысы" газетінің Жамбыл облысындағы меншікті тілшісі
Тараз көлік және коммуникация колледжінде «Автоматика, телемеханика және теміржол көлігіндегі қозғалысты басқару» мамандығы бойынша білім алып жатқан 2 курс студенттері Тараз станциясына экскурсия жасады.
Арнайы пән оқытушысы А.Әділбаев АТУ-22-1 тобының студенттеріне «Сигнал беру, орталықтандыру және бұғаттау құрылғыларына техникалық қызмет көрсетуді, жөндеуді және телемеханикалық бақылауды орындау» пәні бойынша өтетін тақырыптық сабақтардың теориясын іс жүзінде көрсете отырып түсіндірді.
– Теміржол көлігіндегі сигнализация туралы нұсқаулықтың негізгі ережелеріне сәйкес, пойыздардың қозғалысы және теміржол көлігіндегі маневрлік жұмыс жөніндегі нұсқаулық бар. Соның бірі – станциялардағы әр түрлі сигнал беру, орталықтандыру және бұғаттау құрылғылары және пойыздардың қозғалысы кезінде сигнал беру және байланыс құралдары кезінде пойыздарды қабылдау, жөнелту және өткізу. Теміржол көлігіндегі қозғалысты басқаратын мамандар осы нұсқаулықты және тәжірибе жүзінде қалай іске асыру керегін білуі керек. Сондай-ақ студенттер теміржолда және жөндеу-құрылыс жұмыстарын жүргізу жағдайында пойыздарды қабылдау және жөнелту іс жүзінде қалай орындалатынын тәжірибеде көрсе, сабақта өткен теориялық ережелерді есте жақсы сақтайды, – дейді А.Әділбаев.
Тәжірибелік сабақта болашақ мамандар теміржол бойында пойыздарды қабылдау және жөнелту кезінде қандай сигналдар берілетінін іс жүзінде көрді. Сондай-ақ оларға жол бойындағы бағыттамалық бұрмалар арқылы қозғалыстар қалай басқарылатыны түсіндірілді.
Жалпы мамандар білім берудің дуалды жүйесінде тәжірибелік сабақтардың берері көп екенін айтады. Колледждің өндірістік оқыту шебері Т.Мырзабаев мұндай дәрістерден кейін студенттердің мамандыққа деген қызығушылықтары арта түседі дейді.
Мысалы, «Темір жолдың вагондар мен рефрижераторлы жылжымалы құрамын пайдалану, жөндеу және техникалық қызмет көрсету» мамандығының 1 курс студенттеріне «ЖамбылРемСервис» ЖШС кәсіпорнына саяхат ұйымдастырылған. Өндіріс шебері кәсіпорынның негізгі міндеттерімен және өндіріс жұмыстарымен таныстырып, мекеме базасындағы жұмыс қалай орындалатынын, бөлшектерді жөндеудің толық циклы қалай өтетінін көрсетіп, түсіндірген. Экскурсиялық сабақтан соң болашақ мамандар аралық сынақтарда жақсы нәтиже көрсеткен.
