Қазалы станциясы айына 1000 вагон жүк түсіреді
Қызылорда облысы бойынша меншікті тілші
Бірінші класты Қазалы станциясы – аймақтың солтүстігіндегі өндірістік станция. Алпысқа жуық станция теміржолшысы пойыздардың қозғалыс қауіпсіздігі мен жүк тасымалын кедергісіз ұйымдастыру жолында кәсіби міндеттерін абыроймен атқаруда.
Қазалы станциясының жүк түсірілім көлемі айына шамамен 1000 вагонды, ал жүк тиеу көлемі күніне 20 вагонды қамтиды. Жыл басынан бері өндірістік жұмыс көрсеткіштерінің белгілеген меже бойынша орындалған.
– Теміржол көлігінің экономикалық жағынан дамуы артып келеді, қатынас бағыттары түрлі мемлекеттер арқылы жүзеге асуда. Станция жұмысшыларының 80 пайызы жоғары білімді, тәжірибелі теміржолшылар. Олар өздеріне бекітілген қызметтік міндеттерін жақсы біледі, мінсіз орындайды. Табиғаттың мазасыз мезгілдерінде теміржолшылардың бірінен-бірінің көз жазып қалмай сақтанып жұмыс жасауы назарда ұсталады. Еңбеккерлердің барлығы маусымдық киім мен қажетті заттармен уақытылы қамтамасыз етіледі. Мемлекеттік және кәсіби мерекелерде компания мен бөлімше басшылығы тарапынан түрлі марапатқа ие болып жатқан қазалылық теміржолшылар қатары аз емес, – дейді Қазалы станциясының бастығы Серік Боранқұлов.
Айтуынша, станцияға аялдайтын пойыздарды рет-ретімен қабылдап, оларды құжаттары бойынша керекті операциялардан өткізіп, қайта жөнелту жұмыстарын станция кезекшілері Ө.Қарабеков, Б.Қараев, А.Дарибаевтар абыроймен атқарып келеді. Ал парк кезекшілері Ә. Мектепова, Г. Утеалиева, Е. Усенбаев, Ж. Сарменов жүк операцияларының кәсіби деңгейде атқарылуына үлес қосып жүр. Пойыз вагондарының тасымал құжаттарын өндеу операторлары Ұ. Мұханова, С. Карабай станция жұмысы көрсеткіштерінің жоспарға сай орындалуына, жалпы станциядағы өндірістік жұмыстардың ақаусыз атқарылуына атсалысып жүрген майталман мамандар.