Бәйгеқұм станциясындағы бір күн

Қызылорданың Бәйгеқұм станциясы аймақтың оңтүстігінде орналасқан. Бір кезде ол жерде өнімі құрылысқа пайдаланылған Қамыс зауыты болды, іргедегі Қауынбаздан қара күзге дейін Сырдың бал татыған қауын-қарбызы тиеліп, алыс-жақын шетелдерге жөнелтілетін.

Бүгінде өндіріс орындары жұмысын тоқтатып, базары тарқаған бекетте тек теміржолшылар тірлігі жалғасын тауып отыр. Ауысыммен жұмыс жасайтын Бәйгеқұм станциясының теміржолшылары барлық қозғалысты РЦУП диспетчерлерінің реттеуімен жүзеге асырады. Жалпы үш жолы мен екі тұйық, кірме жолы бар шағын бекетте еңбек саласының қарапайым жұмысынан бастағандар, олар – станция бастығы әрі механигі Шерияздан Рахманқұлов пен станция кезекшілері Айхан Әлтаева мен Зүмрет Бакиров, Өмірбек Ахметов жетекшілік ететін жол дистанциясының жолшылары, вагон қараушы-жөндеушілер Серікбай Досқадіров, Мұрат Сақтағанов, КТСМ операторлары Бақытқали Ешматов пен Нұрбол Сәулебеков, байланысшы-электромеханик Сейілхан Байжанов, су мұнарасы операторы Дархан Жұмаділдаев сынды тәжірибелі, кәсіби мамандар. Қазір мұндай шағын бекеттерде станция кезекшісі мен механик жұмысы кіріктірілгендіктен теміржолшылар негізгі міндеттен бөлек жанама жұмыстарды қоса жүргізеді. Мысалы, жүк вагондары сирек тоқтайтын станцияда пойыз құрастырушының міндетін станция бастығы атқара береді. Шағын болса да шаруасы мығым бекетте биылдыққа қозғалысқа нұқсан келтіретін жағдайлар тіркелмеген. Қысқасы, шағын ғана ұжым станция шаруасын дөңгелетіп отыр.  

Билет кассасы болмаса да Қызылорда-Көкшетау, Қызылорда-Петропавл және Қызылорда-Түркістан бағытында қатынайтын жолаушылар пойыздары аялдап, жергілікті халықтың қажетін өтеп тұр.  

– Басты міндетіміз – қозғалыс қауіпсіздігін қамтамасыз ету. Күнделікті графикте белгіленген жұмыс станциялықтар үшін аз шаруа емес. Мысалы, 684-ЦЗ пәрменімен бекітілген графикте көрсетілген жұмыстар станция шекарасынан өтетін пойыздардың қозғалыс қауіпсіздігін арттыру үшін атқарылады. Және күн сайын атқарылған жұмыстардың уақыты көрсетіліп, арнайы ШУ-2 және ДУ-46 журналдарында хатталады. Хатталып қана қоймай, өзара атқарған жұмысымызға есеп беріп бақылап отырамыз, – дейді станция кезекшісі Зүмрет Бакиров.