Шиелі станциясындағы көрсеткіш көз қуантады
Қызылорда облысы бойынша меншікті тілші
Қызылорда жүк тасымалы бөлімшесінің Шиелі станциясы – күрежолдың бойында орналасқан ірі тораптық станция. Әрі-бері тынымсыз зулаған өткінші жүк және жолаушы құрамдардан бөлек, өндірістік орындар шоғырланған аймақта жергілікті жүк те аз емес.
Жыл басынан бергі уақыт аралығында өндірістік жұмыс көрсеткіштерін 107 мен 297 пайыз аралығында орындаған станция ұжымы 394 пойыздың 16757 вагонын бөлшектеп, 14 757 вагондық 410 пойызды құрастырған. Көріп отырғанымыздай, жұмыс көрсеткіштерінің кейбірін шамамен үш есеге жуық асыра орындауға қол жеткізген. Бөлімшенің оңтүстігіндегі тораптық станция бастығының орынбасары Нұрғали Әбжапбаров шілде айында станциядағы атқарылған өндірістік жұмыстар шегіне жетіп, жоспар 113-339 пайыз аралығында орындалғанын жеткізді.
– Бөлімше мен компания басшылығы бекіткен тапсырмалардың жиынтығы біздің жұмыс көрсеткішіміздің өлшемі саналатындықтан оны орындаудан аянып қалған емеспіз. Нәтижеміз, міне осындай... Әріптестерімнің барлығына басшылық атынан алғыс айтамын, – деді станция бастығының орынбасары.
Шілде айында 1903 жүк вагонын кірме жолдарға берген шиеліліктер ол жолдарда 1893 вагонға жүк тиер тиісті бағытқа жөнелткен. Станцияның пойыз құрастырушылары бір айдың ішінде пойыздардан 2100 вагонды ажыратып, 2094 вагонды пойызға жеккен. Осыншама ауқымды жұмыстың техникалық талапқа сай құжаттарын реттейтін теміржолшылар – тауар қабылдап жөнелтушілер, техконтор, тауар кассирлері, станция диспетчерлері мен кезекшілерінің кәсіби шеберлігі шиеліліктерді осындай нәтижеге жеткізіп отыр.