Абайлаңыз, пойыз!
Ақтөбе облысы бойынша меншікті тілші
Жіңішке жүк станциясының бойы – қауіпті аймақ. Жүк пойыздары жиі өтетін бірінші класты станция айналасында адам аяғы басылмайды.
Жуырда жергілікті теміржолшылар мектеп оқушыларымен кезекті кездесу өткізіп, тағы да қауіпсіздік жайын сөз етті. Жіңішке станциясының жол шебері, инженері және желілік тәртіп сақшыларынан құралған топ қаладағы №36 мектепке барды. Білім ордасындағы кездесуде темір жол бойында болатын түрлі қайғылы жағдайлар баяндалды. Жолды қысқарту үшін белгіленбеген жерден кесіп өткендер, құлаққап шешпей жолда асықпай жүретіндер, ішімдік ішіп селфи жасаймын деп мерт болған адамдардың әрекеті туралы мысалдар айтылды. Сонымен қатар жолдағы ескерту белгілерін сындырып кететіндер әрекеті де қатаң сөз болды.
«Темір жол бойында қайғылы жағдайларға жол бермес үшін алдын алу, қадағалау шараларының барлық мүмкіндігін жасап жүрміз. Еңбек ұжымдары мен оқу орындарында кездесулер өтіп, түсіндіру жұмыстарын жиі жүргіземіз. Бірақ оны тыңдайтын да, тыңдамайтын да бар», – деді Жіңішке станциясының инженері Анар Мұқанова.
Жіңішке жүк станциясынан негізінен кен өнімдері тиеледі. Тәулігіне төрт пойыз қабылдап, тағы төртеуін жөнелтіп отырған станцияда ауыр жүк вагондарының қозғалысы жиі. Станцияның екі жақ бетінде елдімекен орналасқан бұл тұста қауіпсіздік мәселесі әрдайым өзекті.