Енді Доссорға пойыз тоқтайды
Атырау облысы бойынша меншікті тілші
Атыраудың Доссор кенті 13-15 мың халқы бар, теміржолдың бойында орналасқан елдімекен. Досссорлықтар үшін іргеден өтіп жатқан жолаушы пойыздарына қолжетімсіздік үлкен проблема болып отыр.
Кешеге дейін Доссор кентінің тұрғындары №41-42 «Атырау-Алматы» бағытындағы пойызға отыру үшін ат сабылтып не аудан орталығы Мақатқа, не 100 шақырым жердегі Атырау қаласына баруы керек болды. Өйткені аталған пойыз Доссор станциясына тоқтамайды. Бұл жолаушыны қанша әбігерге салатыны өзінен өзі түсінікті. Бір жылдары осы пойызды станцияда 2 минутқа аялдайтын қылған. Кейін алып тастады.
«Жолаушылар тасымалы» АҚ Атырау телімінің бастығы Қуандық Бағытжанұлының айтуынша, биылғы жылдан бастап жергілікті халықтың талап-тілегіне орай №29-30 «Атырау-Шымкент» пойызы Доссор станциясына 10 минут аялдайтын болды, ал кері бағытта 7 минутқа тұрады. Бұл – мініп-түсетін жолаушылар үшін жеткілікті уақыт. Енді доссорлықтар әрлі-бері сабылу машақатынан құтылды. Үйінен шыға сала тура пойызға келіп мініп кетеді. Алайда №41-42 «Атырау-Алматы» пойызының маршруттан алынып тасталуы жолаушылардың наразылығын тудырып отырғаны рас. Жолаушылар Шымкентке дейін барып, әрі қарай не басқа пойызға мініп, не автобуспен баруға мәжбүр...