Станциялар қалпына келтіріледі
"Қазақстан теміржолшысы" газетінің Жамбыл облысындағы меншікті тілшісі
Жүк тасымалының қарқын алуымен ертеректе жабылып қалған станциялар мен бекеттердің қайта ашылуы – жағымды жаңалық. Былтыр Жамбыл жүк тасымалы бөлімшесіне қарасты «Бірлік-2» станциясын қалпына келтіру жұмыстары басталған.
Қазір онда құрылыс жұмыстары қыза түскен. «Бірлік-2» станциясын қалпына келтіру – Мойынты – Шу – Алматы телімінің өткізу қабілетін, пайдалану жағдайын жақсарту мақсатында қолға алынған.
Станцияны қалпына келтіру үшін 2024 жылғы күрделі жөндеуден шыққан ескі темірбетон торы пайдаланылуда. 29 мың текше метр жолға қиыршық тастар төселген соң темірбетон негізіндегі бағыттамалық бұрмалардың 32 жаңа жиынтығы салынады.
Бөлімше басшылығының пікірінше, Бірлік-2 станциясын қалпына келтіру жұмысы қажеттіліктен туындап отыр. Ол станция іске қосылса, Шу станциясының жүктемесі айтарлықтай азаятын болады. Бүгінде аймақта жүк пойыздарының жүктемесі артқан. Бірлік-2 станциясы іске қосылса, Алматыдан келе жатқан жүк пойызын Шуға кіргізбей, бірден Мойынтыға, Астанаға бағыттап жібере беретін болады.