Белкөл станциясының тынысы (Фото)
Қызылорда облысы бойынша меншікті тілші
Белкөл – облыс орталығының іргесіндегі өндірістік станция. Қызылорда ЖТ бөлімшесіндегі маңызды бекеттердің бірі. Өткен жылы өндірістік жұмыстардың жоспарлы көрсеткішін артығымен орындауға қол жеткізген белкөлдіктер пойыздардың қозғалыс қауіпсіздігін қатаң сақтап, апатты жағдай тіркелмеген.
Станция бастығының орынбасары Ғабит Тлеубаев мәлімдегендей, өткен жылы өндірістік жұмыс көрсеткіштері 104 пен 123 пайыз аралығында орындалып, жолаушы және жүк тасымалы, пойыздарды уақытылы қабылдап-жөнелту, вагондарды тиеу мен түсіру секілді негізгі өндірістік бағыттар бойынша жоғары деңгейде жүргізілген. Жүк және коммерциялық жұмыстары бойынша жарамсыздық жағдайы тіркелмеген. Өндірістік жұмыс кезінде вагонның кешіктірілуі, транзитті вагондардағы қауіпті жүктің зақымданып, пойыз құрамынан ағытылу жағдайы да орын алмаған.
– Өткен жылы 550 вагонға 33 606 тонна жүк тиеліп, 10 035 вагоннан 602 100 тонна жүк түсірілді. 2023 жылдың межесінен әлдеқайда артық. Жүк тасымалы, тиіп-түсіру, өндірістік процестерде вагонның зақымдануы мен кешіктірілуіне жол берілмей, қауіпсіздік көрсеткіштері жоғары деңгейде орындалды. Бұл жетістіктер станция қызметкерлерінің кәсібилігі мен жауапкершілігінің нәтижесі болып табылады. Мәселен, парк кезекшілері Мақсат Сеитов, Әлібек Тәжібаев пен Жасұлан Аптықалықов, пойыз құрастырушылар Қанат Нұрымбетов пен Сағындық Айтмырзаев, тасымал құжаттарын өңдеу операторлары Алтынай Бектауова мен Бауыржан Бедеров, аға тауар кассирі Жанар Сахиева өндірістік жұмыстардың сапалы орындалуына басымдық беріп, өз үлестерін қосып жүрген тәжірибелі теміржолшылар, – дейді әріптестерінің мерейін үстем етуге асыққан станция бастығының орынбасары.
Бүгінде қатал қыс маусымында еңбек етіп жатқан станция теміржолшылары маусымдық киімдермен түгел қамтылған, әлеуметтік-тұрмыстық қажеттіліктерін қамтамасыз етуде кедергілер жоқ.
