Жылғаның жауапкершілік жүгі ауыр

Шымкент электрмен жабдықтау дистанциясына қарасты Жылға тартымдық стансасы оңтүстіктегі тұтас теміржол жүйесінің жұмысына ықпалы зор. Оның қызметін Шымкент қаласы мен бірнеше аудандағы салалық кәсіпорындар тұтынады.

Нұрғозы Рысқұлов жетекшілік ететін Жылға тартымдық стансасында небәрі 6 маман жұмыс істейді. 1987 жылы қолданысқа берілген шағын тартымдық станса деңгейінде болса да қызметі ауқымды. Олар ауысымдық кезекшілік арқылы станциядағы электр энергиясының жай-күйін күндіз-түні кірпік қақпай қадағалап, жұмысын жүргізіп келеді. Бұл жерге Ташкенттегі ГРЭС-тен 220 кВт энергия алынады да, солтүстігіндегі Монтайтас станциясы арқылы Шымкентке қарай тартылған желімен үздіксіз жөнелтіледі. Одан бөлек, 2020 жылы Жылғадан Монтайтасқа шығар жол жиегінде 40 гектар аумақта орналасқан күн панельдері станциясы іске қосылғаны белгілі. Міне, сол күн көзінен қуат өндіру алқабы бүгінде Жылға тартымдық стансасын 35 кВт энергиямен қамтамасыз етіп келеді. Сонда біз әңгіме етіп отырған тартымдық стансасының электр энергиясын өңдеу қуаты 255 кВтты құрайды деген сөз. Оның 220 кВт-ын транзиттік сипатта өңдесе, қалған 35 кВтпен елді мекен тұрғындары мен теміржол шаруашылығындағы қызметке және станцияға келіп-кетер электровоздар қозғалысын қамтамасыз етуге пайдаланылады.  

Шымкент жүк тасымалы бөлімшесі мен атқарушы органдардың бастамасымен осыдан 7 жыл бұрын Жетісай өңірін электр энергиясымен қамтамасыз ету мақсатында Жылға подстанциясының аумағы кеңейтіліп, әлеуеті арттырылған. Яғни сол кезде күрделі қайта жаңғырту жұмыстарының нәтижесінде, 220 кВт-тық биік бағаналы қос желі Қызыләскерге қарай тартылған. Сол желінің екінші нүктесінен деңгейі Жылғамен шамалас шағын подстанция бой көтеріп, ел игілігіне пайдалануға берілген. Аталған нысанның ірілі-ұсақты жұмыстары өткен жылы толық тәмамдалып, осы кездері мінсіз қызмет көрсетіп келеді. Алайда, Қызыләскердегі подстанцияны қалыпты жағдайда қолдануда Жылға тартымдық стансасы басымдыққа ие. Демек, бұл дегеніміз дәреже-деңгейі тартымдық станса болғанмен, алты-ақ адамнан құралған теміржолшылар ұжымының қызметі мен арқалайтын жауапкершілік жүгі өте ауқымды деген сөз.  

– Өзбекстан мен Қазақстан теміржолының шекаралық белдеуінде жатқан Жылға станциясында орналасқан біздің тартымдық стансаның жұмысы шынында да өте ауқымды. Дегенмен, осындағы алты адамның бәрі өз жұмысын бес саусақтай білетін кәсіби мамандар. Сондықтан барлық жұмысты талапқа сай атқарып, өзімізге жүктелген сенім үдесінен шығып отырмыз, – дейді Жылға тартымдық стансасының басшысы Нұрғозы Рысқұлов.