Әйтеке би станциясы жартыжылдықты табысты аяқтады

Әйтеке би – тәуелсіз Қазақстанда пайда болған станция. Хромтау-Алтынсарин теміржолы бойындағы станция бүгінде шаруасын түзеп алған. Алғашқы жартыжылдықты табысты аяқтаған әйтекеліктер алты айда 355 вагон жүк түсіріп, 850 вагон жүк жөнелткен.

Станция бастығы Жандос Әбдіжәлеловтің айтуынша, жүк тасымалында биыл оң көрсеткішке қол жеткізген. Әсіресе жүк тиеу жұмыстарында ауыз толтырып айтарлықтай нәтиже бар. Дәнді дақылдарды жөнелту көрсеткіші де артқан. Астықты аймақ саналатын өңірде астық тиеу жұмыстары қысы-жазы үзілмейді. Диқандар алған өнімін кептіріп, жылдың барлық мезгілінде тасымал қызметіне жүгінеді.  

«Биыл 6 айда 850 вагонға жүк тиеу жүзеге асырылды. Оның 507 вагоны – дәнді-дақыл өнімдері. Олар негізінен Өзбекстан, Тәжікстан. Ауғанстан, Әзербайжан елдеріне жөнелтілді. Астық тиеу, вагонмен уақытында қамтамасыз ету жұмыстарында кедергі жоқ», – деді Жандос Әбдіжәлелов.  

Айтуынша, бұған дейінгі жылдары 9 айда ғана 500-дей вагон дәнді дақыл тиелетін болған. Бұдан бөлек 6 айда 343 вагон ақ каолин сазы Қырғызстанға және Қазақстанның Шымкент, Талдықорған, Сайрам қалаларына жөнелтілген.  

Жүк түсіру көрсеткіші де жоғары. Әсіресе құрылыс жұмыстарына қажетті материалдар артқан. Станцияда 6 айда 355 вагон жүк түсірілген. Оның 21 вагоны көмір, 25 вагон ракушняк, 5 вагон цемент, 27 вагон бидай, 277 вагон қиыршық тас түсірілген.  

Станциядағы бес жолдың екеуі жолаушы пойыздарын қабылдауға арналса, қалған үшеуі жүк тасымалы қызметін ұйымдастыруға бағытталған. 4 жолаушы, 2 қаламаңы пойызы тоқтайтын Әйтеке би вокзалына халық айналадағы елдімекендерден көп келеді. Теміржол қатынасы жоқ Ырғыз, Қарабұтақ ауылдарынан келетін жолаушы көп. Дені Қостанай, Астана, Алматы бағыттарына осы жерден аттанады.  

Станцияның қайнаған өмірін ерсілі-қарсылы зулаған жылжымалы құрамдар толықтырып тұр. 20 жылдық тарихында тек республика ішінде ғана емес, халықаралық байланысқа да негіз болған күрежолдың бойында жатқан станцияның маңызы уақыт өткен сайын артып келеді.