Теміржол рекордтары
Темір жол саласы қызықты деректерге толы. Пойыздар құраманың көптігі, тиеген жүк көлемі, ұзақ қашықтыққа жүру бойынша рекордтар орнатып тұрады. Мұндай рекордтар тізіміне еліміздің темір жол саласы да енгенін білесіз бе?
1986 жылы Екібастұздан Оралға бет алған пойызда 439 вагон болған. Бұл пойыз еліміздің батысына қарай 42 мың тонна көмір жеткізген және ең ұзын құраманың бірі ретінде рекордқа енген.
Кейін жүк тасымалы бойынша жаңа рекорд 2001 жылы Аустралияда тіркелді. Мұнда 82,2 мың тонна темір рудасын тасымалдау үшін жалпы ұзындығы 7350 м болатын 682 вагоннан тұратын құрама жасақталды. Осылайша, бұл пойыз ең ұзын әрі көп жүк тиеген құрама ретінде тарихта қалды.
Ең ұзақ тоқтаусыз теміржол сапарын Мәскеу-Пхеньян пойызында жасауға болады екен. Маршруттың ұзындығы 10 309 шақырымнан асады және бұл дерек Гиннестің рекордтар кітабына енген.
Сондай-ақ, ең ұзын теміржол Мәскеуді Находкамен байланыстыратын ұзындығы 9438 шақырым болатын Транссібір темір жолы. Бұл бағытты толықтай жүріп өту үшін 8 күн 4 сағат 25 минут уақыт кетеді екен.
Былтыр Швейцарияда ең ұзын жолаушылар пойызы рекорд орнатқанын ерекше атап өткен жөн. Ұзындығы 2 шақырымға созылған пойыз Ретий теміржолы бойындағы көрікті жерлердің бір бөлігін, атап айтқанда Альбул/Бернин бағытымен Предадан Бергенге дейін жүріп өтті. 25 вагон тізбегін біріктіру арқылы Ретий теміржолының басшылары 175 жылдық мерейтойын атап өтуді әрі әлемдік рекорд орнатып, жергілікті халық пен шетелдік туристердің назарын аударуды жөн көрген. Эксперимент сәтті іске асты. Оның басты шарты пойызды жүргізген 6 машинистің бірдей іс-қимыл жасауы болды.
Сұраныс бойынша тоқтайтын пойыз
Пойыздардың кез келген жерден қол көтерген адамға тоқтайтыны жайлы естуіңіз бар ма? Алясканың Талкинт қаласынан «Ураган» шатқалы арасында қатынайтын Hurrican Turn пойызында жоспарланған аялдама жоқ. Бұл пойыз сұраныс бойынша ғана тоқтайды. Оған міну үшін жолаушы жүргізушіге ақ орамалын бұлғап, белгі берсе жеткілікті. Мұндай аялдамалардың саны шектеусіз десек те болады.
Биік таулы жердегі маршрут
Қытайда теңіз деңгейінен шамамен 4000 метр биіктікте жүретін пойыз бар. Мұнда әлемдегі ең биік тау темір жолы Цинхай-Тибет жолы бар. Жалпы ұзындығы 1956 км болатын маршруттың белгілі бір нүктелерінде пойыз 5000 м биіктікке дейін көтеріледі екен. Мұндай экстремалды биіктіктер арнайы вагондарды талап етеді: олар толығымен қымталған, ал орындықтардың жанында оттегі беру пульті мен жеке оттегі маскаларын қосатын тетігі бар.