Литва қымбат автокөліктерді пойызбен тасымалдауға шектеу қоймақ
Литва темір жолдары (LTG) 1 желтоқсаннан бастап ел арқылы қымбат көліктердің транзитіне тыйым салады, деп хабарлады жергілікті БАҚ.
Бұл шешім LTG Cargo санкциялардың ықтимал бұзылуын анықтағаннан кейін қабылданған, яғни бірнеше ондаған көлік санкцияны айналып өтіп, Ресейде тіркелген. Шектеулер соңғы бес жылда шығарылған құны 50 мың еуродан асатын көліктерге қатысты болмақ. Құжаттар бойынша Орталық Азия, Грузия және Беларусь елдеріне жөнелтілген 447 Mercedes, Porsche Cayenne, Cadillac және басқа да маркалардың тасымалдануы туралы деректер талданған. Көп ұзамай бұл көліктердің кем дегенде 75-і Ресейде тіркелген екен.
LTG басшысы Эгле Шиме шектеулердің енгізілуін санкцияларды айналып өту әрекеттерімен түсіндірді.
Ол сондай-ақ, көлік компаниясының барлық клиенттері жаңа шешім туралы хабардар болғанын және ықтимал бұзушылықтар туралы жиналған материалдар Литва прокуратурасына жіберілгенін жеткізді.