Испанияда сутегі отынымен жүретін пойыздың екінші сынақ кезеңі басталды
FCH2RAIL жобасы аясында гибридті үшвагонды сутегі отынымен жүретін Civia пойыздарын сынақтан өткізудің екінші кезеңі басталды. Бұл пойыздар қуатты байланыс желісінен, тартқыш батареялардан және сутегі отын элементтерінен ала алады.
Сынақтың алғашқы кезеңі 2023 жылдың мамыр айында Сарагоса — Канфранк желісінде өткен.
Пойызды сынақтан өткізудің екінші кезеңі Мадридтің солтүстік-шығысында орналасқан Торральба — Сория желісінде өтіп жатыр.
FCH2RAIL жобасы электрлендірілмеген жерлерде отын элементтері мен тартқыш аккумуляторларды пайдалану арқылы қол жеткізілетін жоғары автономия деңгейімен электр тартымының тиімділігін біріктіретін пойыз құруға бағытталған.
Оған испан темір жолдарының инфрақұрылымы (Adif) және көлік операторлары (Renfe), пойыз өндіретін CAF компаниясы, сонымен қатар жоба үйлестірушісі – неміс аэроғарыш орталығы DLR, отын ұяшықтарын жеткізуші Toyota Motors Europe және бірқатар басқа компаниялар қатысып жатыр.
Жоба бойынша жұмыс 2021 жылдың бірінші жартыжылдығында басталып, 2024 жылдың соңында аяқталуы тиіс.