Борсықтар теміржол төсемдерін қиратып тастады
Германияда борсықтар теміржол төсемдерін қазып, қиратып тастаған. Германия темір жолдары (DB) бір бағытты Фрёнденберг-на‑Руре — Унна желісінде жол төсемдерінің зақымдалғанын анықтады, деп хабарлайды Rail-news.kz.
Ұзындығы 11 шақырымнан асатын учаскеде жол төсемінің астынан 140-қа жуық шұңқыр мен індер анықталған, бұл шамамен 1500 м болатын желінің бүлінуі.
Теміржол желісінің қазындылары алғаш рет 2022 жылы анықталған. Бұл шұңқырларға бетон құйылып, тегістелген. Қазір кейбір бөліктерге жөндеу жұмысын жүргізу жеткіліксіз болып тұр, толықтай жерасты қабатын ауыстыру қажет.
Германия темір жолдарының айтуынша, жөндеу жұмыстарын жоспарлау және оған рұқсат (желі табиғатты қорғау аймағы арқылы өтеді) алу үшін бірнеше жыл кетеді. Қазір шұңқырларды іздеу үшін алаңдағы өсімдіктерді қырқу жұмыстары басталған.
Неміс баспасөзі желі бойын қалпына келтіру жұмыстарына ондаған миллион еуро кетеді деп жазуда.
Бүгінде Фрёнденберг және Унна станциялары арасындағы қозғалыс тоқтаған. Жолаушыларды автобус тасып жатыр. Жүру уақыты 7 минутқа ұзарып, 23 минутты құрап отыр.