БАӘ-ден Мумбайға дейін су асты пойызы жүруі мүмкін
Біріккен Араб Әмірліктерінің Ұлттық консультативтік бюросы Үндістанға теңіз асты теміржолын салу жобасын қарастыра бастады. Су асты пойызы Үндістанның қаржы астанасы саналатын Мумбай мен портты қала Фуджейра арасында жүреді деп болжануда.
Жоба алғаш рет 2018 жылы талқылана бастады. Су астындағы пойыз сағатына 1000 км жылдамдықпен жүйітки алады деп күтілуде, сондықтан жол жүру уақыты шамамен екі сағатты құрайды, өйткені су астындағы темір жолдың ұзындығы 2 мың шақырымға созылмақ.
Ұйымдастырушылардың пікірінше, жоба Үндістанмен екіжақты сауда мүмкіндіктерін кеңейтуге көмектеседі: Фуджейра Үндістанға мұнай экспорттайтын болады, сонымен қатар Нармада өзенінен БАӘ-ге тұщы суды жеткізеді. Бұған тартылатын инвестиция бірнеше миллион доллар болады деп күтілуде.
Әзірге пойыздардың жолаушылар пойызы болатыны немесе тек жүк тасымалдауға арналатыны туралы еш ақпарат жоқ, дегенмен қандай жағдай болмасын жолаушылар үшін Үнді мұхитының су астындағы өмірін бақылай алатындай туннельді мөлдір ету идеясы бар.
Бұған дейін 2023 жылдың соңына қарай Біріккен Араб Әмірліктерінен Үндістан мен Керала штатына теңіз жолаушылар тасымалы ашылатыны айтылған. Осылайша үндістандық экспаттар әуе билеті үшін артық төлем жасамай, үйлеріне ыңғайлы және үнемді жолмен баруға мүмкіндік алады.
Үндістанның Шарджа қауымдастығы атап өткендей, кеме билеті шамамен 442 дирхам тұрады, ал жол жүру уақыты үш күнді құрайды. Жаңа рейс 2023 жылдың желтоқсан айында мектеп демалысы басталғанға дейін іске қосылады деп жоспарлануда.
Тағы бір айта кетерлігі, БАӘ теміржол операторы Etihad Rail Абу-Даби-Аль-Дханна желісінде жолаушылар пойызын шығаруды жоспарлап отыр. Бұл бағыттың ұзақтығы 250 шақырымды құрайды. Қазір бұл желімен тек жүк пойыздары жүріп жатыр.
Әзірше бұл теміржолмен Абу-Даби Ұлттық мұнай компаниясы ADNOC қызметкерлері ғана жүретін болады. Қазір жолаушылар пойызының дәл қай күні жолға шығатыны және көпшілік онымен қашан қатынай бастайтыны туралы ақпарат жоқ.
Etihad Rail болжамы бойынша, 2030 жылға қарай елдің 11 ірі қаласын байланыстыратын темір жолдардағы жылдық жолаушылар тасымалы 36,5 миллион адамды құрамақ.
Осы жылдың маусым айында 200 км/сағ жылдамдыққа есептелген локомотивке тіркелетін маршруттық пойыздарды жеткізу және қызмет көрсету бойынша испандық CAF компаниясымен құны 250 миллион еуродан асатын келісімшартқа қол қойылған.