Siemens пен Cargounit 100 локомотив жеткізуге келісті
Siemens Mobility және Польшаның ең ірі Cargounit лизингтік компаниясы жалпы саны 100 локомотивті жеткізу бойынша екі келісімшарт жасасты.
Бірінші келісімшарт бойынша Cargounit 90 Vectron MS көпжүйелі электровоз алады (оның 30-ы қатаң тапсырыс бойынша). Екінші келісімшартта 10 Smartron электровозын жасау қарастырылған. Келісімшарт бойынша алғашқы көліктерді жеткізу 2025 жылға жоспарланған.
Siemens Mobility және Cargounit арасындағы ынтымақтастық 2018 жылы бір Vectron MS локомотивін сатып алудан басталды. Қазіргі уақытта лизингтік компанияның паркінде 66 Vectron электровозы және 18 Smartron электровозы бар.
Vectron MS электровоздарының айнымалы токтың түйіспелі желісінен жұмыс істегендегі қуаты 6,4 МВт, тұрақты ток желісінен қоректенгенде – 6 МВт. Локомотивтер Еуропалық пойыздарды басқару жүйесінің ETCS Level 2, Basic Version 3 талаптарына жауап беретін борттық жабдықпен қамтылған. Олар Польша, Германия, Австрия, Чехия, Словакия, Венгрия, Нидерланды темір жолдарында жұмыс істей алады. Smartron электровоздарын Германия, Болгария және Румынияның ұлттық желілерінде пайдалану жоспарлануда.
Осы уақытқа дейін Vectron-ның 2400-ден астам электровозы 16 елдің 97 операторына сатылған. Олар Еуропаның 20 елінде қолдануға рұқсат етілген.