Германия монорельсті жолаушылар кабиналарын әзірлеп жатыр
Германияның үш университеті пайдаланылмай, қараусыз қалған теміржол желілерімен жүретін жолаушыларға арналған Monocab автономды жобасын әзірлеп жатыр. Аталған жоба Еуропалық Одақтың қолдауымен іске асуда.
Кіріктірілген гироскоптардың арқасында қайта зарядталатын батареялармен жұмыс істейтін шағын өлшемді төрт немесе алты орындық кабина бір рельсте қозғала алады, бұл бір жолда екі жақты қозғалысты қамтамасыз етеді. Вагонның ішінде тек отырғыш қана бар.
Маршруттың соңғы станцияларында арнайы құрылғылар кабиналарды қарама-қарсы бағытта қозғалу үшін көрші рельске ауыстырады. Заманауи технологиялар гироскоптары мен электроникасы бар ықшам электр машиналарын жасауға мүмкіндік береді, олар берілген маршруттар бойынша автоматты түрде қозғалады.
Монокаб шағын қалалар мен елдімекендерде электр пойыздарын алмастыру ретінде пайдаланылмақ. Бұл тіркемелердің көмегімен мұндай елдімекендердің тұрғындарының қалаға жетуі оңай әрі жылдам болады деп күтілуде. Монокабтар сонымен қатар электр пойыздарына қарағанда жиі жүре алады, кондукторлар мен машинистерді қажет етпейді және техникалық қызмет көрсету әлдеқайда арзан.
Еуропалық Одақ қоры аталған жобаны 2022 жылы қаржыландыруды бастаған болатын. Бүгінде автокөліктердің алғашқы нұсқалары жасалды, олар әлі күнге дейін өзін-өзі теңестіру жүйесі жоқ екінші рельстің қолдауымен қозғалады. Қазіргі уақытта Monocab-тың алғашқы нұсқаларын сынақтан өткізу жүргізілуде, ал алғашқы маршруттарды іске қосу 2028 жылға жоспарланып отыр.
Германияда елдің аз қоныстанған аудандарын қоғамдық көлікпен қамтамасыз ету, сондай-ақ қазбалы отынды пайдаланудан жүйелі түрде бас тарту тасымал саласына серпін беріп, дамуға түрткі болып отыр. Теміржолмен жүретін бұл шағын кабинкалар жеке көліктерге балама бола алады және жайлылығы жоғары болмақ.
Монорельсті көлік идеясын 20 ғасырдың басында инженер Л.Бреннан алғаш ұсынған. 1909 жылы 32 адам сиятын кабина жобасы көрсетілді. Онда 20 аттың күші бар және іштен жанатын қозғалтқышқа ие. Бұл электр берілісімен кабинаны 35 км/сағ жылдамдықпен жүруін қамтамасыз етеді.
