Иран ШЫҰ-ға кіргеннен кейін ұйым мүшелері Чабахар портының мүмкіндіктеріне қол жеткізе алады
Астанада өткен ШЫҰ-ға мүше мемлекеттер Сыртқы істер министрлері кеңесінің отырысына қатысқан Үндістан Сыртқы істер министрлігі басшысының экономикалық мәселелер жөніндегі орынбасары Дамму Рави осылай деді, деп хабарлайды Rail-news.kz.
«Мықты байланыстар кез келген аймақтың дамуы үшін маңызды, өйткені олар сауда мен сенімді арттырады. Иран ШЫҰ-ға кіргеннен кейін Чабахар портын барынша пайдалану үшін жұмыс істей аламыз», - деді Дамму Рави.
Сондай-ақ дипломат «Солтүстік-Оңтүстік» халықаралық көлік дәлізінің маңыздылығын атап өтті. Дамму Рави бұл «теңізбен шектеспейтін Орталық Азия елдеріне Үнді мұхитына шығу үшін қауіпсіз және тиімді жол бола алатынына» сенімді.
Бұған дейін Дели мен Тегеран Ислам Республикасының оңтүстігінде орналасқан Чабахар портын пайдалану туралы келісімге қол қойған болатын. 10 жылдық келісім автоматты түрде ұзартылады.