Өзбекстан Hyundai пойыздарын шығармақ
Өзбекстан көлік министрінің орынбасары Жасурбек Чориев Hyundai Rotem компаниясының өкілі Квак Чол Хунмен кездесіп, электр пойыздарын шығаратын өндіріс орындарын құру мүмкіндігін талқылады, деп хабарлайды Rail-news.kz.
Ташкентте өткен кездесуде екі тарап елдің теміржол инфрақұрылымын дамыту перспективаларына назар аударды.
Жиынға қатысушылардың айтуынша, «Ташкент жолаушылар вагондарын салу және жөндеу зауыты» АҚ базасында жаңа өндіріс ашу жоспарлануда. Бұл Оңтүстік Корея мен Өзбекстан арасындағы әріптестікті нығайтуға, сондай-ақ көлік саласын дамытудағы маңызды қадам болмақ.
Hyundai Rotem компаниясының өкілдері электропойыздар өндірісін локализациялау туралы презентация көрсетті. Кездесу барысында тараптар ынтымақтастықтың түрлі аспектілерін, соның ішінде өндірістің ықтимал көлемін және осы жобаны жүзеге асыру үшін қажетті инвестицияларды талқылады. Бұл жергілікті өнеркәсіпті дамыту үшін маңызды қадам болмақ.
Бұл жолы ресми құжатқа қол қойылмаса да, тараптар бірлескен жұмысты жалғастыруға келісті. Кездесуге қатысушылар оңтүстіккореялық компанияның ұсынысын егжей-тегжейлі талдап, Ташкенттегі өндіріс орындарын кеңейту мүмкіндіктерін бағалауды ұйғарды.