Өзбекстанда жаңа жолаушылар вагондары таныстырылды

Өзбекстан темір жолдары – «Узбекистон темир йуллари» ресми түрде 61-950 және 61-951 үлгісіндегі жаңа жолаушылар вагондарын таныстырды, деп хабарлайды Rail-news.kz.  

Ұзындығы 26 м болатын бұл вагондар локомотивтік тартымдағы пойыздар үшін Ташкент жолаушылар вагонын жасау және жөндеу зауытында (ТВСРЗ) құрастырылды. Бұған дейін өндірілген 24 м вагондардың орнына жаңа үлгілерді шығару туралы шешім 2024 жылдың наурызында қабылданған. 2024 жылдың соңына дейін 35 вагон жасалды, 2025 жылы 70 дана шығару жоспарланған, ал болашақта жылына 100 вагонға дейін өндіру көзделген.

Жаңа вагондар кең әрі ыңғайлы ұйықтау орындарымен қамтылған, әр купеде ауа температурасын реттеу мүмкіндігімен, мобильді құрылғыларды қуаттауға арналған тоқ көзі, экологиялық таза санитарлық тораптармен және қауіпсіздікті қамтамасыз ету үшін бейнебақылау жүйесімен жабдықталған.

Бұдан бөлек, «Узбекистон темир йуллари» тапсырысы бойынша зауыт Ташкент – Бұхара бағытына арналған 12 вагоннан тұратын құрам жасады. Оның ішінде екі VIP-классты, төрт бизнес-классты және төрт эконом-классты вагон, сондай-ақ мейрамхана-вагон мен дизельдік қуат қондырғысы бар қосалқы вагон бар. Желдету жүйесі пойыз тоқтаған кезде де жұмыс істейді.

Зауытта көрші елдерге экспорттауға арналған жолаушылар вагондарын өндіру де жолға қойылған.