Қытайда туристік қонақүй-пойыз жолға шықпақ
Шаньдун провинциясындағы Циндао қаласында Хуанхэ өзеніне арналған туристік қонақүй-пойыз таныстырылды. Бұл пойызды CRRC Sifang және Қытай теміржолдары құрамына кіретін China Railway Zhengzhou Group компаниялары жасап шығарған, деп хабарлайды Rail-news.kz.
2025 жылдың сәуір айының ортасынан бастап ол Қытайдың орталық бөлігінде орналасқан Хэнань провинциясындағы Хуанхэ өзенінің аңғарында Лоян, Аньян және Саньмэнься қалалары арасында қатынайтын болады. Бағыт бойында көркем табиғат көріністері мен көптеген туристік орындар бар.
Пойыз қызмет көрсету, қауіпсіздік және жайлылық жағынан жоғары санаттағы қонақүйлермен тең деңгейде. Мүмкіндігі шектеулі жандар мен егде жастағы адамдар үшін арнайы жағдайлар қарастырылған — жарықтандырылған тұтқалар, сырғып кетуге қарсы еден жабыны орнатылған.
Пойыз 14 ұйықтайтын орны бар вагоннан тұрады, оларда екі, үш және төрт орынды купелер бар. Сондай-ақ мейрамхана-вагон (мұнда жолаушыларға танымал аспазшылар дайындаған дәмді тағамдар ұсынылады), шай бөлмесі мен демалыс аймақтары бар көпфункционалды вагон және қызметкерлерге арналған арнайы вагон бар. Бұдан бөлек, пойызда шұғыл медициналық көмек көрсетуге арналған қажетті құралдармен жабдықталған медицина пункті жұмыс істейді.
Әр купеде құрғақ және ылғалды аймақтары бөлінген санитарлық торап, дәретхана, жедел көмекке шақыру жүйесі, жеке жарықтандыру, тоқ көздері мен USB-ұяшықтар қарастырылған. Вагондар жоғары дыбыс оқшаулауымен ерекшеленеді, ал үлкен терезелер күн сәулесін барынша тиімді пайдалануға мүмкіндік береді.
Жаңа туристік пойыз өңірлік экономика мен туризмді дамытуға ықпал етеді.