Зәңгезүр дәлізі Түркия арқылы жалғасады
Түркияда елдің теміржол желісін Әзербайжанның Нахчыван эксклавымен жалғайтын желінің құрылысы басталды, деп хабарлайды Rail-news.kz.
Жаңа екі жолақты, электрлендірілген магистральдың ұзындығы 224 шақырымды құрайды. Ол Карс қаласынан Әзербайжан шекарасындағы Дилуджу бекетіне дейін созылады. Құрылысты Түркияның ірі инфрақұрылымдық холдингтерінің бірі – Kalyon Insaat жүргізеді.
Жұмыс таулы жерде өтетіндіктен, күрделі рельеф 24 туннель, 10 ірі көпір және көптеген ұсақ инфрақұрылым нысандарын салуды қажет етеді. Жобаның құны 2,4 млрд еуро деп бағалануда.
Бұл жобаның басталуы бірнеше рет кейінге шегерілген. 2022 жылдан бері Карс – Дилуджу теміржолы мемлекеттік инвестициялық бағдарламаға тұрақты түрде енгізіліп келді, алайда іс жүзінде ілгерілеу болмады. Жоба тек Әзербайжан мен Армения арасында Зәңгезүр дәлізін ұйымдастыру жөнінде уағдаластыққа қол жеткізу мүмкіндігі туғаннан кейін белсенді кезеңге өтті. Бұл келіссөздерде АҚШ президенті Дональд Трамп ара ағайын болды.
Каспий стратегиялық зерттеулер институтының (КИСИ) сарапшысы Александр Караваевтың айтуынша, Карс – Дилуджу магистралі жылына 15 млн тоннаға дейін жүк өткізе алады. Бұл көрсеткіш 2030 жылға қарай халықаралық Солтүстік – Оңтүстік көлік дәлізінің батыс тармағының есептік өткізу қабілетіне сәйкес келеді. Сарапшының пікірінше, бұл көлем аймақтың болашақтағы жүктемесіне сай.
Сонымен қатар, ол бағыт халықаралық еуразиялық тасымалдардың негізгі дәліздері (Қазақстан мен Ресей арқылы өтетін) аясында қосымша рөл атқарса да, Карс – Дилуджу жолы Әзербайжан – Армения – Түркия арасындағы субаймақтық ынтымақтастықтың маңызды элементіне айналып, тауар айналымын ұлғайтуға және аймақтағы қазіргі әрі болашақ өнеркәсіптік аймақтар арасындағы байланыстарды нығайтуға мүмкіндік береді.