Швейцария рельс арасына орнатылатын күн панельдерін сынақтан өткізді
Швейцариялық Sun-Ways стартапы қолданыстағы теміржол рельстерінің арасына орнатылатын әлемдегі алғашқы алынбалы күн панельдері жүйесін сынақтан сәтті өткізді, деп хабарлайды Rail-news.kz.
2025 жылдың сәуірінде басталған пилоттық жоба барысында бұл учаске арқылы 11 мыңнан астам пойыз өтіп, қозғалысқа немесе теміржол инфрақұрылымына ешқандай кедергі келмеген. Осы уақыт ішінде жүйе 16 мың кВт·сағ-тан астам электр энергиясын өндіріп, жергілікті желіге берді.
Ұзындығы шамамен 100 метр болатын сынақ теліміне жалпы қуаты 18 кВт болатын 48 күн панелі орнатылған. Қажет болған жағдайда панельдерді жол жөндеу жұмыстары үшін қысқа уақытта шешіп алуға болады.
Сынақ нәтижесі пойыздардың қозғалысы жүйенің жұмысына әсер етпейтінін көрсетті. Керісінше, пойыздан пайда болатын ауа ағыны панельдердің бетін табиғи түрде тазартып отыратыны анықталған. Сонымен қатар машинистер күн сәулесінің шағылысуына қатысты ешқандай шағым түсірмеген.
Жобаға Францияның ұлттық теміржол операторы SNCF қызығушылық танытып, технологияны өз желісінде сынақтан өткізуді жоспарлап отыр. Ал Sun-Ways есебінше, Швейцариядағы теміржолдардың рельсаралық кеңістігін толық пайдалану жылына 1 млрд кВт·сағ-қа дейін электр энергиясын өндіруге мүмкіндік береді. Дегенмен, технологияны кең көлемде енгізу үшін энергияны желіге қосудың инженерлік шешімдерін жетілдіру қажет.