Қазақстан брендіне айналуы тиіс өнім

Новости

24.02.2017, 10:55

Ақтөбеде бой көтерген рельсарқалық зауыты өңірдің ғана емес, бүкіл Қазақстанның мақтанышына айналып отырған бірегей өндіріс орны. Соңғы инновациялық жетістіктермен жарақтанған зауыт халықаралық стандарттар талабына толық жауап береді. Өткен жылы Ақтөбе рельсарқалық зауыты 76 миллиард теңгенің өнімін шығарған. Кәсіпорындағы орташа жалақы мөлшері бүгінгі таңда 220 мың теңгені құрайды. Осы аптада рельсарқалық зауытының ұжымымен кездескен Ақтөбе облысының басшысы Бердібек Сапарбаев кәсіпорынның өткен жылғы көрсеткіштерімен танысқанын жеткізіп, биылға жоспарларымен танысып, бірқатар ұсыныстарын да білдірді. Облыс басшысы таяуда Елбасы Нұрсұлтан Назарбаевтың қабылдауында болғанын, 2016 жылы өңірдегі әлеуметтік-экономикалық көрсеткіштердің алдыңғы жылмен салыстырғанда жақсарғанын, тіпті республикалық деңгейден де жоғары екенін, ал онда Ақтөбе рельсарқалық зауытының қосып отырған үлесі қомақты екенін жеткізді. –Әлемдік стандарттарға сәйкес келетін мұндай зауыт саусақпен санарлық. Сондықтан, Ақтөбедегі рельсарқалық зауытының өнімі алдағы уақытта Қазақстанның брендіне айналуы керек,– деді облыс басшысы. Ал АРАЗ басшылығы бүгінде зауыт толық қуатына көшуге дайын екенін, сұраныс көбейсе, өнім көлемін арттыруға барлық мүмкіндік бар екенін жеткізді. Сонымен қатар, облыс басшысына жұмысшылардың әлеуметтік тұрмыс жағдайы, қосымша төлемдер туралы да баяндап берді. Айталық, зауыт былтыр әлеуметтік мәселелерді шешуге 300 миллион теңге жұмсаған екен. Бүгінде зауыт қызметкерлері осындағы асханадан тегін тамақтанады. Қала сыртында орналасқан зауытқа қатынау үшін жұмысшыларға арнайы автобус қарастырылған. Кәсіпорын жұмысы, әрине, оның өнімін өткізуге байланысты. Бүгінде өз еліміздің темір жолдарына төселіп жатқаннан бөлек, Өзбекстан, Әзіржайбан, Тәжікстан елдерімен келіссөздер жүргізілген. –Өткен жылы экономикалық дағдарысқа қарамастан, өңір экономикасының құлдырауына, жұмыссыздар санының көбеюіне жол бермедік. Жалақы, зейнетақы, жәрдемақы дер кезінде беріліп келеді. 2017 жылғы көрсеткіштер де өткен жылғыдан төмен болмауы керек. Бәсекелестікке төтеп беретін, қазіргі заманның сұранысына сәйкес болатын өнімдер шығаруымыз керек. Халықтың тұрмысын жақсарту үшін жұмыс орындарын көптеп құрып, Елбасы берген тапсырмаларды орындауға күш салуымыз керек, – деген облыс басшысы биылғы Президент жолдауында белгіленген басымдықтарға тоқталып, кәсіпорын басшыларына одан әрі өндіріс көлемін арттыруға, оның ішінде қазақстандық үлесті көбейтіп, жоғары білікті мамандарды даярлау және бизнестің әлеуметтік жауапкершілігі мәселелері бойынша нақты тапсырмалар берді. Айта кетейік, зауыт жоғары жылдамдықты теміржол магистральдерін салуға арналған рельстер шығарады, жобалық қуаты — 430 мың тонна дайын өнім, оның ішінде 200 мың тонна рельс және 230 мың тонна пішінді илек. Шара соңында зауыт басшысы, аумақтық кәсіподақ бірлестігі мен облыс әкімі арасында еңбек қатынастарын реттеу, әлеуметтік кепілдіктерді қамтамасыз ету жөнінде меморандумға қол қойылды.

Қазақстан брендіне айналуы тиіс өнім

Читайте также

Газета Қазақстан теміржолшысы, №46 от 16 июня 2026 года