Әйелдер мойындалған күн

Новости

10.03.2017, 15:45

«Шымкент жүк бөлімшесі» ЖТ филиалы алты жылдан бері Ұлттық компания бойынша өндірістік жарыстарда алда келеді. Бұл жеңісте, сөз жоқ, бөлімшедегі мыңға жуық қыз-келіншектің үлесі бар. 8 наурыз мейрамының құрметіне әріптес қыз-келіншектерді көктемнің алғашқы мерекесімен құттықтаған филиал директоры Ермекбай Ерманов осылай деді. Кәсіподақ комитетінің ұйымдастыруымен өткен мерекелік шара теміржолшы әйелдердің көңілін көтеріп, мерейін асырды. – Сіздердің күнделікті үй мен жұмыс арасындағы тірліктеріңіз «инемен құдық қазғандай» көзге көрінбейтін, бірақ тауқыметі көп жұмыс. Таңмен таласа тұрып бала мен үйдегі мырзаның, ата-әженің шайын беріп, одан балабақшаға жүгіресіздер. Сосын асығып жұмысқа келесіздер. Кешке дейін бізбен бірдей еңбек етіп, содан соң тағы балабақшадан үйге жете сала, қазан көтеріп, ас қамдап, бала-шаға, отағасы, ата-ене бар, бәрінің жоғын түгендеп болғанша түннің жарымы болады. Таңертең тағы сол қарбалас басталады, міне, құдайдың құтты күні таңның атысы, күннің батысы бір тыным таппайтын сіздерден біздің үйренеріміз көп. «Әйелдің қырық жаны бар» деген осы шығар. Жандарыңызға шуақ, бойларыңызға қуат тілеймін, – деп ағынан жарылып, ақ тілегін білдірді Ермекбай Тілеуұлы. Магистральді желі бөлімшесінің бастығы Марат Оңалов та өз сөзінде жұмыстың алға жылжып, табыстың еселеніп жатқаны өз ісіне тындырымды да тиянақты әйел азаматтардың еңбегінің арқасы екенін жоққа шағармады. Бөлімше директорының орынбасары Ералы Дербісбеков пен бас инженер Хайролла Сәрсенов те әйелдерге осы күні ең әдемі сөздері мен тілектерін арнады. Жиын соңында бөлімше басшылары еңбектегі жетістіктері үшін Балжан Назарова, Жұмагүл Сарбасова, Аида Бекжанова, Күлән Мыңбаева, Раушан Омарова, Ұлдан Ешімбетова, Әзида Құбанова, Людмила Квон, Тамара Ахметова, Ольга Иваненко сынды бірқатар қыз-келіншектерге Құрмет грамотасын табыс етті.

Әйелдер мойындалған күн

Читайте также

Газета Қазақстан теміржолшысы, №46 от 16 июня 2026 года