827 ауыр салмақты жүк пойызы жөнелтілген

Жамбыл жол бөлімшесінде негізгі өндірістік көрсеткіш – жүк айналымы ағымдағы жылдың 4 айында 6508,4 миллион тонна/км құрап, жоспардан 6,5 пайызға немесе 395,4 миллион тонна км артты. Жалпы жүк тиеу көлемінің 32,7 пайызын химиялық тыңайтқыштар, 18,7 пайызын цемент өнімдері құрап отырғанын атап өткен жөн. Былтырғы сәйкес мерзіммен салыстырғанда жоспар 30,8 пайызға асыра орындалды. Химия, цемент өнімдерімен қатар, мұнай, қара металл сынықтары, химикаттар, сода, астық және басқа да ерекше маңызға ие жүктерді тиеу көлемі артты. Вагонға статистикалық жүктеме жоспары 1,5 пайызға немесе 0,51 тонна/вагонға көбейді. Жол бөлімшесінде биылғы жылдың алғашқы тоқсаны ішінде 827 ауыр салмақты жүк пойызы жөнелтіліп, жоспардан тыс 405,563 мың тонна жүк тасымалдануына қол жеткізілді. –  Біздің негізгі міндеттеріміздің бірі – жүрдек пойыздардың жылдамдығын көтеруге мүмкіндіктер жасау. Жоғары жылдамдықта қозғалыс қауіпсіздігін күшейту, апатқа жол бермеу мақсатында биылғы төрт ай ішінде «СМД-80» машинасын қолданумен жолдың 3,126 шақырымында күшейтілген-орташа жөндеу жұмыстары жүргізіліп, 3891 темір-бетон, 1 және 2 типті 2410 ағаш шпал ауыстырылды. Жамбыл жол бөлімшесі 2015 жылы бюджетке 2464698 мың теңге, ал биылғы 4 айда 674 880 мың теңге салықтық аударым жасады. Бөлімшеге қарасты компания филиалдары мен еншілес мекемелерінде қызмет атқаратын 10 мыңнан астам теміржолшылардың  қажырлы еңбектері осындай жетістіктерге қол жеткізуге, жұмыс сапасы мен қозғалыс қауіпсіздігінің артуына игі ықпалын тигізуде. Елбасының «Нұрлы жол – болашаққа бастар жол» атты Жолдауында атап көрсетілген жаңа экономикалық саясат бойынша «Шу-Алматы» бағытындағы екінші  жол салу жобасын «Теміржолжөндеу» және «Жолжөндеуші» компаниялары жүзеге асыруда.  2015 жылы 1 181 189 мың теңге, ал биылғы жылдың 4 айында 80 540,527 мың теңге игерілді, – дейді Жамбыл жол бөлімшесінің директоры Дәулетбай Есімбеков.

Ерман ӘБДИЕВ, Жамбыл