Қара шаңырақтың киесі

Новости

18.03.2017, 14:44

Теміржолшыға тән жауапкершілік пен төзімділік, қарапайымдылық - кәсіп иесінің мінезін қалыптастырады. Ауыр саланың жүгін жеңілдету үшін бірлесіп, ынтымақта тірлік ететін сала мамандары отбасында да осы қағиданы ұстанатындай. Арыстық Рысбековтер әулетінде теміржолшы мамандығын үйдің тұңғышы Дүйсен бастаған. Соңынан інілері еріп, одан немере буын жалғап, бүгінде әулеттің еңбек өтілі 250 жылға жетіпті. Дүйсен 1979 жылы Арыс станциясына кезекші болып орналасып, 1991 жылға дейін осында жұмыс атқарады. Тағдырға не шара, сол жылы кенеттен дүниеден өтеді. Әкесі Қайболда қария да Арыс станциясындағы жүк сақтау қоймасының меңгерушісі болып зейнетке шыққан екен. Екінші ұл Жайлау 31 жылдан бері станцияда диспетчер болса, Сайлау құрылыс саласын таңдаған. Қали 1981-1994 жылдары пойыз құрастырушы болып, одан кейін Арыс станциясындағы ЖІІБ-не ауысып, зейнетке шыққанша 15 жыл еңбек етіпті. Әли 1988 жылдан, Тасқын 1989 жылдан бері Арыс бекетінде станция кезекшілері. Талғат 24 жылын пойыз құрастырушы кәсібіне арнаса, Қырықбай 1997 жылдан бері жолсерік. Қазір «Астана – Сарыағаш» пойызында жолаушыларға қызмет етуде. Бұл әулеттің келіндері де несібесін теміржолдан айырып отыр. Үлкен келіндер Жұмақыз бен Айман Арыс станциясында оператор, ал Мейрамгүл маневр диспетчерінің операторы. Немерелері Нұржан мен Азаматтың Арыс локомотив пайдалану депосында бірі машинист, бірі көмекші болғанына жеті жылдан асқан. Самат пен Нұркелді ЖІІБ-не қызмет етіп, темір жол бойының тыныштығын күзетуде. Әр мереке сайын Қараспан ауылындағы әулеттің қара шаңырағында бас қосатын Рысбековтер аналары Бизаданың қолын алып қайтады. Батыр ананың аман-есен жетілген он екі ұл-қызынан бүгінде 45 немере, 16 шөбере тарапты.

Рысбековтер әулетін жұрт «ынтымағы жарасқан отбасы» деп бекер айтпаса керек.Бүгінде әулеттің ақылшысына айналған Жайлау теміржолда өсіп- өніп отырған әулет мүшелерінің ынтымақтылығы қарашаңырақта отырған аналарының арқасы, сол қарашаңырақтың киесі деп біледі. «Әр мәселені үлкендігімді алға тартып, өзім білермендікке салмай бауырларым мен келіндерімді шақырып ортаға саламыз. Әрқайсының пікірін сұрап, сосын барып анамыздың байлауын күтеміз»,- дейді наурыздың жиырма үшінде 55 жасқа келетін Жайлау Қайболдаұлы. Отыз жыл бір саланың «жілігін шаққан» тәжірибелі маман 2000 жылы «Қозғалыс қауіпсіздігі үшін» төсбелгісін тақса, Темір жолдың 100 жылдығы мерейтойында алтын сағат иеленіпті.

Қара шаңырақтың киесі

Читайте также

Газета Қазақстан теміржолшысы, №107 от 23 декабря 2025 года