Айлық анықтаған ақаулар

Новости

28.03.2017, 16:32

Бүйірлік рамасының ақауы жиі орын алуы бүгінде таңсық болмай қалды. Сондықтан осы бүйірлік рамаларының ақауына байланысты арнайы айлықтар өткізіліп, қырағылықты арттыру шаралары қолға алынуда. Маңғыстау вагон пайдалану депосының техникалық қызмет көрсету бөлімінің жетекшісі Жұмабек Якупбаев желтоқсан мен наурыз айлары аралығында өткен кезекті айлық кезінде анықталған ақаулы оқиғалар жайлы айтып берді. – 20 желтоқсанда аға вагон қараушы Ерлан Ереков бізде бұрын-соңды кездеспеген аса ірі көлемді жарықты тапқан еді. Вагонға жаңа бүйірлік рама салынып, 21 қаңтар күні шығып кетті. Одан бері де бүйірлік рамадағы 5 ақау анықталды. 5 қаңтар күні Е.Ерековтың ауысымында вагон бақылаушы Ерполат Сәбітаев, 7 қаңтарда аға вагон қараушы Нұрлыбек Құрбанбаевтың ауысымында вагон бақылаушы Берік Дүйсенбаев 661 03 342 вагонының бүйірлік рамасынан сынықты анықтады. Сондай-ақ, 9 қаңтарда №22 ағымдағы ағыту тұйығында 601 68 747 вагонынан вагон қараушы Байрамбай Тыныштықов ақау тапты. Ағымдағы ағыту тұйығына түскен вагон басқа бір ақаумен алып келініп, барлық құрылымы түгел қаралатындықтан, жұмыс барысында қосымша ақаулық анықталып жатыр, – деді Ж.Якупбаев. Оның сөзінше, дәл осылай тағы бір "Д " образды сынық 9 қаңтардан 10-на қараған күні сағат 23:00-де жетінші жолға тоқтаған №525 27 744 вагонының бүйірлік рамасында кездескен. Вагон локомотивтен ағытып алынып, дереу деполық жөндеуге жіберілген. – Бұл вагон Ресейдікі болатын және ол бізге дейін сонша жол басып өтті. Технологиясы бойынша бүйірлік рамасын дәнекерлеуге болмайды. Соған қарамай біз анықтаған тесік дәнекерленіп, үстіне қарамай жағылған екен. Сырт көзге байқалмайтындай. Осындай анықталуы қиын ақаулықты вагон бақылаушы Әділет Байсейітов айнаның көмегімен тауып отыр, – деген вагондарға техникалық қызмет көрсету бөлімі басшысының мәліметіне 2008-2016 жылдары аралығында елімізде 80-нен астам бүйірлік раманың сынып кетуі орын алған көрінеді және талдау нәтижесі мұндай жағдайдың негізінен қыста болатынын көрсеткен. – Бүйірлік рамасының қыс кезінде сынуы – біріншіден металдың құйылуына және оның қыста сынуға бейім болуына байланысты. Қазір 2009, 2010, 2011, 2014 жылдары шыққан бүйірлік рамаларында да жарық сынықтар кездесуде. Олар әлі сынуға тиісті емес. Бүйірлік рамасы зауытта 5 жыл кепілдікпен, 30-35 жылға жарамдылықпен жасалады. Сондықтан қандай белгідегі бүйірлік рамаларында жиі ақау кездесетінін өзімізге белігілеп, жұмысшыларға таныстырамыз. Тағы осы бүйірлік рамалары ерекше бақыланады. Негізінде вагонның бұл бөлшегі қайта жөндеуге келмейді, әрі өте қат, – дейді Ж.Якупбаев.

Айлық анықтаған ақаулар

Читайте также

Газета Қазақстан теміржолшысы, №51 от 04 июля 2025 года